Ermənistan ya Zəngəzur dəhlizini öz xoşuyla açır ya da ... - Politoloq - ednews.net

2 Dekabr, Cümə axşamı

Ermənistan ya Zəngəzur dəhlizini öz xoşuyla açır ya da ... - Politoloq

Analitika A- A A+

Ermənistan parlamentində Qarabağla bağlı bəyanat qəbul edilməyib. Bəyanat “Ermənistan” və “Mənim şərəfim var” müxalifət fraksiyaları tərəfindən hazırlanıb. Bəyanat yalnız xarici deyil, həm də daxili siyasətə aid olub. Eyni zamanda bəyanatda Azərbaycan və Türkiyə əleyhinə ifadələr yer alıb. Hakim “Vətəndaş müqaviləsi” fraksiyasının rəhbəri Ayk Kondjoryan bildirib ki, bəyanat qəbul edilməyib.

Ermənistan parlamentində Azərbaycan və Türkiyə əleyhinə bəyanatın qəbul edilməməsini münasibətlərin bərpası istiqamətində atılan növbəti addım hesab etmək olar.

Politoloq Yeganə Hacıyeva EDNews.net-ə açıqlamasında bildirib ki, Ermənistanda Azərbaycan və Türkiyə ilə münasibətlərin yaxşılaşmasının işartılarını izləməkdəyik.

“Ermənistanda belə bir bəyanat qəbul edilmədi, həmçinin bu gün Ermənistanda hökumətin növbədənkənar iclasında Ermənistan Təhlükəsizlik Şurası rəhbəri Armen Qriqoryanın “Azərbaycanla delimitasiya və demarkasiya məsələlərində danışıqlara hazırıq, Azərbaycan tərəfindən hərəkətlilik, siqnal gözləyirik deyib. Bu gözlə görünən və Ermənistan parlamentinin simalarının bəyanatın qəbul edilməməsinin müdafiəsinə və bəyanatın əleyhinə səsləndirdiyi fikirləri bu istiqamətdə irəliləyişlər kimi dəyərləndirə bilərik”.

Politoloqun sözlərinə görə, Ermənistanın istər Azərbaycan, istərsə də Türkiyə ilə sərhədlərinin müəyyənləşməsi qısamüddətli hesablamada belə Ermənistanın xeyrinədir: “Bu, ən azından Ermənistanı blokadadan çıxarır. Digər bir məqam, məsələn Armen Qriqoryanın iki həftə öncə Zəngəzur dəhlizi ilə bağlı fikrin əleyhinə belə bir fikir səsləndirməsi və fərqli mövqe ortaya qoymasını əlbəttə ki, Rusiya prezidenti Vladimir Putinin çıxışı ilə bağlamaq lazımdır. Məsələ ondadır ki, Ermənistan tərəfi bura KTMT-dən tutmuş ATƏT-in Minsk Qrupu formatına kimi çox sayda müşahidəçilər cəlb etmək üçün fəaliyyət göstərdi. Hətta İrandan belə “Gorus-Qafan yolunun müdafiəsini təşkil edə bilərik” mesajları gəlmişdi. Bu cür çoxsaylı cəhdlərdən sonra Rusiya prezidenti “Bu məsələdə biz üçümüz – Rusiya, Azərbaycan və Ermənistan varıq, Rusiyada bu xəritələr var və qarşılıqlı kompromislər əsasında bunlar müəyyənləşməlidir” deyərək nöqtəni qoydu. Ermənistan parlamentində çox sayda hansı ilin xəritələrinin olmasıyla bağlı dezinformasiyalar səsləndirilir. Rusiyanın özünün də Rusiya, Ermənistan və Azərbaycan baş nazirlərinin müavinləri səviyyəsində görüşdən mediaya sızan xəritələrlə bağlı ümumi təsəvvürlər var. Xəritələrlə bağlı əsas mesaj belədir ki, Ermənistan ya Zəngəzur dəhlizini öz xoşuyla açır, ya da biz 1920-ci ilin xəritəsinə dönərək Meğri və Zəngəzuru Azərbaycanın ərazisi olaraq müəyyənləşdiririk. Və Azərbaycanın da kompromisi bu olur ki, dəhlizin açılması həm də Ermənistana bundan istifadə imkanı verir. Yəni burada fikir formalaşdırılmasında aktiv istifadə olunan çoxlu sayda variasiyalar var. Bizim ölkəmizdə də mediada proseslərlə bağlı bəzən kənar maraqlara xidmət edən şərhlər gedir. Amma reallıq ondan ibarətdir ki, Zəngəzur bə Meğri dəhlizi açılmalıdır.

Ekpert əlavə edib ki, A. Qriqoryan bu günlərdə delimitasiya və demarkasiya xəritələrlə bağlı fikirlərini bildirib: “1920-ci ilin xəritəsi hüquqi qüvvəsi olan tək xəritədir. Azərbaycanın o vaxt Zaqafqaziya və onun hüquqi varisi kimi ümumilikdə SSRİ-nin tərkibinə daxil olduğu dövrdəki sərhədlərilə müəyyənləşməlidir. Hətta A. Qriqoryan da etiraf edib ki, bu xəritələrlə proseslərə başlamasına Ermənistan tərəfi də etiraz etmir və tək hüquqi qüvvəsi olan xəritə 1920-ci ilin xəritəsidir. Biz Azərbaycan olaraq, SSRİ-yə hansı ərazi ilə girmişiksə, o miqdarda ərazi ilə də SSRİ-dən çıxmalıydıq. Bundan kənarda olanların hamısı SSRİ-nin idarəçiliyində bizim torpaqların Ermənistana verilməsi idi. Bu heç bir halda bizim razılığımızla deyildi. Bu, Ermənistana SSRİ-nin ərazi bütövlüyünün artırılması məqəsədilə deyil, məhz istifadə üçün verilmişdi. Bu səbəbdən Zəngəzur dəhlizi problemini ya delimitasiya və demarkasiya məsələləri, ya da xəritələr həll edəcək. İstənilən halda bu davam edəcək”.

Gülnar Səlimova

Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır

6.3.4. ictimai və dövlət maraqlarının müdafiəsi

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...