Bəzi siyasi maneələrə baxmayaraq həm qərbdə, həm də şərqdə üzərinə ciddi siyasi yük götürən Türkiyə, son zamanlar irimiqyaslı layihələrdə yer almaqdadır. Lakin siyasi ekspertlər Türkiyənin çoxşaxəli xarici siyasi fəaliyyəti ilə özünü həddindən artıq yük altında qoyduğunu və bunun nəticəsində ölkənin tənəzzülə uğraya bilməsi kimi risklərini qeyd edir.
Bu dəfə Türkiyə Ukrayna ilə Rusiya arasında gedən ərazi problemi məsələsində vasitəçi olmaq niyyətini açıqlayıb. Ötən gün bunu Türkiyə prezidenti Rəcəb Tayyib Ərdoğan bəyanatında bildirib. Ukraynaya “Bayraktar TB2” PUA-larının satışından sonra rəsmi Moskva ilə münasibətlərində cüzi problemlər yaranan Türkiyə xüsusilə Krım məsələsində vasitəçi olmaqda maraqlı olduğunu dilə gətirib.
Türkiyəli siyasi analitik, “Haber Türk” kanalının tanınmış simalarından olan Bülent Aydəmir məsələ ilə bağlı EDNews.net-ə açıqlama verib. O, ilk öncə Türkiyənin vasitəçilikdə maraqları və bunu qarşılaya biləcək imkanlarından söz açıb.
“İlk olaraq qeyd edim ki, Türkiyənin Ukrayna və Rusiya arasında vasitəçilik etmək niyyətini önəmli hesab edirəm. Lakin imkanlar baxımından bunun real olduğunu düşünmürəm.
Əslində, siyasi və diplomatik cəhətdən bunu əhəmiyyətli sayıram, çünki Türkiyənin hər iki ölkə ilə ayrı-ayrılıqda xüsusi münasibətləri var. Bu münasibətlər həm Rusiyadan S400 raketlərini almaq, həm də Ukraynaya “Bayraktar TB2” satmaq baxımından xüsusi önəm daşıyır”.
B.Aydəmir həmçinin Türkiyənin Ukrayna ilə Rusiya arasında vasitəçi qismində iştirak edəcəyinin nə dərəcə real olmasına, o cümlədən Türkiyənin bu addımının Rusiya ilə olan münasibətlərinə hansı formada xələl gətirə bilməsinə toxunub.
“Bilirsiniz, qeyd etdiyim ki, Türkiyənin vasitəçi olması nə qədər önəmli olsa da, bunun mümkün olması bir o qədər də inandırıcı deyil. Lakin ümumi baxdıqda Türkiyə bir NATO ölkəsidir və burada əsas Türkiyənin vasitəçi olduğu halda, onun təsir qüvvəsinin nə dərəcədə ola biləcəyidir.
O ki qaldı rəsmi Ankaranın vasitəçilik etməsinin Rusiya ilə Türkiyə arasında münasibətlərinə təsirinə, bunu tam izah etmək bir qədər mürəkkəbdir. Çünki Rusiyanın reaksiyası və bu məsələni asanlıqla qəbul etməsi şübhəlidir. Sadəcə bir şeyi də əlavə edə bilərəm ki, əgər tərəflərin ümumi razılığı olsa, burada Türkiyə-Rusiya münasibətlərinə hər hansı xələl gəlməsindən söz gedə bilməz”.
Elnur Ənvəroğlu
.jpeg)
