Rusiya Federasiyası 2014-cü ildə Ukrayna ərazilərinin bir hissəsini işğal etdikdən sonra orada yaşayan ukraynalılara Rusiya pasportlarının verilməsini icbari xarakter aldı. Bu proses demək olar ki, məcburi şəkildə həyata keçirilirdi.

Əvvəlcə qondarma “DXR” və “LXR” pasportunu, sonradan isə Rusiya Federasiyasının pasportunu ala bilməyən insanlar, işini itirə və ya işlə təmin olunma problemi yaşaya, işğalçı hakimiyyət tərəfindən təqiblərə məruz qala bilirdi, onların hüquqları məhdud idi.

Nəticədə, Ukraynanın işğal olunmuş ərazilərində bir qrup yeni Rusiya vətəndaşları adlanan şəxslər var ki, onların bəziləri pasportlarını aldıqdan dərhal sonra Rusiyaya gediblər. Xüsusən də onların arasında 2014-cü ildə işğalçı qüvvələrə dəstək verən və onlara muzdlu kimi qoşulan satqınlar az deyil.

Bu muzdlu separatçılardan ciddi döyüş təcrübəsi olanları Rusiya Federasiyası Silahlı Qüvvələrində işə düzələrək Ermənistan ərazisində Rusiya hərbi kontingentinin tərkibində peyda olub.

Eurasia Diary-nin öz mənbələrinə istinadən verdiyi məlumata görə, Ermənistanın Ararat rayonunun Armaş kəndi ərazisində hərbi qulluqçu, 1982-ci il təvəllüdlü Aleksey Kartaşov xidmət göstərib. Rusiya Federasiyasının bu vətəndaşı Luqansk vilayətinin Sverdlovsk şəhəri sakinidir və uzun müddət qondarma “LXR”də qeyri-qanuni silahlı birləşmənin sıralarında olub.

O, Rusiya vətəndaşlığını aldıqdan sonra nizami qoşunların tərkibində Rusiyada xidmət edib və hazırda Rusiya hərbi kontingentinin tərkibində Ermənistan ərazisində xidmət edir.

Amma bu əsgərlə bağlı başqa bir şey maraq doğurur. Məsələ burasındadır ki, o, çox maraqlı bir məqamda Daxili İşlər Nazirliyinin bazasında olub. Məlumata görə, A.S.Kartaşov ciddi ruhi xəstəlik - "evdən və ya xüsusi səhiyyə orqanından çıxan ruhi xəstə və ya köməksiz" kimi siyahıya alınıb.

Bundan əlavə, Aleksey Kartaşov İnterpolun məlumat bazasındadır.

Ermənistandakı Rusiya kontingentində Ukraynanın işğal olunmuş ərazilərindən mühacirlərin peyda olmağa başlaması təəccüblü deyil. Rusiyanın bu "vətəndaşı" xidməti "vəzifəsini" yerinə yetirərkən ölərsə, RF Silahlı Qüvvələrinin komandanlığı onun ailəsinə icbari ödənişləri ödəməkdən imtina edə bilər. Yəni, bu qəbildən olan hərbçilərin itkisi ölkə büdcəsi üçün yük deyil.

Digər tərəfdən, belə insanlar başqaları üçün real təhlükə yaradır. Təkcə potensial düşmən olaraq qəbul etdikləri üçün deyil, həm də həmkarları üçün.

Amma başqa bir məsələ önəmlidir - Rusiyanın Qarabağdakı “sülhməramlı” kontingentində nə qədər belə azmış “vətəndaş” xidmət edir. Axı, onların hər birindən hər an gündəlik hadisədən tamamilə fərqli səviyyəli, münaqişəyə səbəb ola biləcək hərəkətlər gözləmək olar.