Ermənistan silahlı qüvvələri yanvarın 11-i günorta saatlarında Azərbaycan-Ermənistan dövlət sərhədinin Kəlbəcər rayonu istiqamətində Azərbaycan ordusunun mövqelərini yenidən atəşə tutub. Ermənistan ordusunun təxribat xarakterli hücumu nəticəsində Azərbaycan ordusunun bir hərbi qulluqçusu şəhid olub.
Azərbaycan ordusunun hərbi birlikləri dərhal düşmən qüvvələrinə ağır zərbə endirib. Ordumuzun cavab tədbirləri nəticəsində Ermənistan tərəfi ciddi itki verərək, geri çəkilməyə məcbur olub.
Maraqlıdır ki, bu toqquşmadan bir gün əvvəl erməni tərəfi təbliğat maşınını işə salaraq, Azərbaycan tərəfinin Qarabağ ərazisində ermənilərə atəş açdığı barədə məlumat yaymışdı. Toqquşma baş verən gün isə Ermənistan Müdafiə nazirinin müavini açıqlama verərək, hər an gərginlik yaşana biləcəyini söyləmişdi.
Maraqlıdır, Ermənistan hal-hazırda Azərbaycanla sərhəddə belə təxribatlara əl atmaqla hansı məqsədləri güdə bilər?
Məsələ ilə əlaqədar EDNews-net-ə açıqlama verən siyasi ekspert və sabiq xarici işlər naziri Tofiq Zülfüqarov hesab edir ki, Ermənistan ordusunun bu kimi təxribatlarının arxasında üç əsas məqam dayana bilər.
“Birinci məqam ondan ibarətdir ki, Ermənistan ordusunda bəzi orta və ya aşağı səviyyəli hərbçilər vəziyyəti gərginləşdirmək üçün təxribatlara əl atırlar. Biz bilirik ki, Ermənistanın özündə bir neçə mərkəz var və ölkədə onların dayaqları çox güclüdür. Həmin hərbiçilər də bu mərkəzlər tərəfindən idarə olunur. Hərbiçilər onların təşəbbüsü altında hərəkət edirlər. Eləcədə Ermənistan və Azərbaycan ordusunun postları arasında məsafə o qədər də uzaq deyil”.
Politoloq Ermənistanın Qazaxıstanda baş verən hadisələrdən öz maraqları üçün istifadə etməyə çalışdığını da bildirib: “Ermənistan hakimiyyəti nəyəsə nail olmaq üçün Qazaxıstanda gedən proseslərdən istifadə eləmək niyyətindədir. Onlar çalışırlar ki, Azərbaycanla sərhəddə üçüncü dövlətinin hərbi qüvvələrini cəmləşdirsinlər. Və bunun vasitəsilə özlərinin təhlükəsizliyi təmin olunsun. KTMT-nin Qazaxıstana girməsi onlarda buna ümid yaradıb. Ona görə ki Azərbaycan ordusunun imkanlarından qorxurlar və ehtiyat edirlər”.
Tofiq Zülfüqarov üçüncü məqamın təbii şəraitlə bağlı olduğunu nəzərə çatdırıb: “Biz bilirik ki, Kəlbəcərdə mövsümlə əlaqədar vəziyyət o qədər də yaxşı deyil. Bu bölgədə çətin iqlim və hava şəraitinin ağırlığı səbəbindən Azərbaycan ordusunun hərbi birlikləri arasında kommunikasiyalarda problemlər yaşanır. Belə olan halda Ermənistan hərbiçiləri Azərbaycan ordusunun imkanlarını yoxlamağa çalışırlar. Əlbəttə, bunu təxribatlar yolu ilə edirlər. Ancaq Azərbaycan ordusu bu təxribatların qarşısında ayıqdır. Ordumuz İsrailsayağı düşmənin təxribatlarına adekvat cavab verir. Nəticədə bir hərbiçimizin şəhid olmasına qarşılıq Ermənistan ordusu üç-beş qat itki verir. Bu taktika düşmənin təxribata meylliyini azaltmaq üçün ən yaxşı vasitədir”.
Yunis Abdullayev
