"Üçtərəfli bəyanat imzalandıqdan bu günədək əksəriyyəti mülki şəxs olmaqla, 219 nəfər mina qurbanı olub".
Bunu Xarici İşlər Nazirliyinin Mətbuat Xidməti idarəsinin rəisi Leyla Abdullayeva Ermənistanla Azərbaycan arasında imzalanan razılaşmanın nəticələri ilə bağlı son açıqlamasında bildirib.
Diplomat Ermənistan tərəfinin xəritələri təqdim etməsi, habelə iki dövlət liderlərinin Brüssel görüşlərində xoş niyyətlə iştirak etmələrinə baxmayaraq, mülki vətəndaşlarımızın bu günə qədər də mina qurbanı olduqlarını vurğulayıb.
XİN rəsmisi qeyd edib ki, bu ilin yalnız aprel ayında baş vermiş 9 hadisə nəticəsində 10 nəfər minalardan xəsarət alıb.
Ermənistan hökuməti Azərbaycanla münasibətlərin birmənalı olaraq qaydaya salınması üçün təşəbbüs göstərsə də, qeyd olunan vəziyyət münasibətlərin köklü həllinə xələl gətirir.
Bəs, Azərbaycsan hökumətinin bu sahədə Ermənistandasn gözləntiləri nədir? Bu sahədə rəsmi İrəvan hansı addımları atmaq fikrindədir?
Məsələ ilə bağlı Beynəlxalq Münasibətlər və Diplomatiya Araşdırmaları Mərkəzinin rəhbəri politoloq Samir Hümbətovun Ednews-a açıqlaması zamanı 6 aprel Brüssel görüşündə mina məsələləri və xəritələr mövzusunda söz açılmadığına baxmayaraq, tərəflərin münasibətlər mövzusunda artıq lazımi addımlar atmalı olduğunu, habelə mina problemlərini nəzərə alaraq Ermənistan tərəfinin xəritələri tam təmin etməsinin labüdlüyünü vurğulayıb.
“Düzdür, Azərbaycan bundan əvvəl mina xəritələri müqabilində Ermənistan tərəfi ilə onlara məxsus hərbi terrorçuların qaytarılması ilə bağlı dəfələrlə anlaşma əldə edib. Laikin Ermənistanın təqdim etdiyi xəritələr reallıqdan tamamən uzaq olub. Bu gün münasibətlərin normallaşdırılmasından söz gedirsə, mütləq burada qarşılıqlı addımlar atılmalıdır. Ümid edirik ki, həm Azərbaycan, həm də Ermənistan XİN-nin birgə təşəbbüsü ilə yaradılacaq komissyanın fəaliyyət istiqamətlərindən biri də, mina xəritələrinin tam təqdim edilməsi ola bilər. Həqiqətən də əhalinin öz yurdlarına geri qaytarılması kimi böyük bir layihə ilə bağlı bu çox aktual məsələdir. Əgər mina məsələsi həll edilməzsə, bu gələcəkdə iki dövlət arasında böyük narazılığa gətirib çıxara bilər”.
Ekspert mina xəritələrinin təqdim edilməsində Rusiyanın da rolunu vurğulayıb.
“Çox güman ki, bizə lazım olan mina xəritələri Rusiya Müdafiə Nazirliyində mövcuddur və Azərbaycan tərəfi hesab edirəm dırnaqarası rus sülhməramlılarının orada olduğunu nəzərə alaraq, həm də onlara müraciət etməlidir.
Bundan əlavə, mina təmizlənməsi proseslərində Ermənistan tərəfi də bilavasitə cəlb edilməlidir. Burada dəqiq xəritələrlə Ermənistandan da aidiyyəti tərəflərin birgə iştirakı ilə minalar təmizlənərək əhalinin həmin ərazilərə köçürülməsi mümkün ola bilər. Hesab edirəm Azərbaycan Xarici İşlər Nazirliyinin nəzərdə tutduğu əsas hədəf də elə budur”.
Elnur Ənvəroğlu
