Serbiyanın müdafiə naziri Kosovoda vəziyyətin olduqca gərgin olduğunu bildirib.
Ednews xarici KİV-ə istinadən xəbər verir ki, o, ifadəsində “Kosovanı yandırmaq bir qığılcıma bənddir”, – deyə sərt fikir səsləndirib. Nazir bildirib ki, hər şey arzuolunmaz istiqamətdə gedə bilər.
Serbiya Baş nazirinin müavini Miloş Vuçeviç yerli televiziya kanalına danışarkən ölkəsi ilə Kosovo arasındakı münasibətləri dəyərləndirib.
''Kosovonun Metohiya əyalətindəki atmosfer o qədər gərgindir ki, ən kiçik insident hadisələrin arzuolunmaz istiqamətdə getməsinə səbəb ola bilər və bu, təəccüblü deyil, çünki rəsmi Priştina və Kosovonun Baş naziri Albin Kurti davamlı olaraq sabitliyi pozmaqla və serbləri Kosovodan qovmaqla məqsədyönlü hərəkətlər edir”.
O Serbiya hökumətinin Kosovodakı serblərin daim yanında olduğunu vurğulayıb.
Kosovonun şimalındakı partlayışın pərdəarxası səbəbləri
Kosovonun şimalında fəaliyyət göstərən dörd bələdiyyə üzrə dekabrın 18-də keçiriləcək növbədənkənar yerli seçkilər ərəfəsində ona yaxın bəzi şəhərlərdə partlayış və siren səsləri eşidilib.
Hadisə ilə bağlı Avropa İttifaqının Qanunun Aliliyi Missiyasına (EULEX) bağlı qüvvələr Mitrovitsa şəhərinin cənub və şimal tərəflərini birləşdirən İber körpüsündə nəzarəti gücləndirib.
Hətta Kosovo Mərkəzi Seçki Komissiyasının (KQZ) rəsmiləri yerli polisin müşayiəti ilə şimaldakı ofislərinə getmək istəyərkən, içəri buraxılmayıblar. Hadisəni törədənlər aşkar edilməsə də, bunun haradan və nə səbəbdən qaynaqlandığı bir qədər üzə çıxmaqdadır. Bəzi analitiklər hətta bunu serblər tərəfindən bir provokasiya kimi də qələmə verib.
Xatırladaq ki, Serbiya və Kosovo arasında gərginlik ötən ay Kosovodakı etnik serblərin Serbiya dövləti tərəfindən verilən avtomobil nömrələrinin Kosovodan olanlarla dəyişdirilməsi qərarına etiraz olaraq bütün mərkəzi və yerli qurumları tərk etməsi ilə alovlanıb.
Qeyd edək ki, Kosovo 2008-ci ildə Serbiyadan ayrılaraq öz müstəqilliyini elan edib. Bunula yanaşı, ABŞ, Böyük Britaniya, Fransa, Almaniya və Türkiyə də daxil olmaqla, BMT-yə üzv ölkələrin əksəriyyəti onu qonşusundan ayrıca muxtar ölkə kimi tanıyıb.
Buna baxmayaraq, Serbiya Kosovonun onun ərazisi olduğunu israr etməkdə davam edir.
Elnur Ənvəroğlu
