Oktyabr ayının 7- dən etibarən Qəzza böhranı çərçivəsində Türkiyə ilə İsrail arasındakı gərgin münasibətlər ötən gün daha da yeni fazaya keçib. Belə ki, bu, Türkiyə Ticarət Nazirliyi ötən axşam İsrail ilə bütün ticari əlaqələrin kəsilməsi ilə bağlı çıxan xəbərləri təsdiqləməsi nəticəsində öz əksini tapıb.

Bəs bu iki ölkə arasında ticari əlaqələrin nəticəsi nə olacaq? Hansı ölkə buradan daha ziyanlı çıxacaq?

Ednews xəbər verir ki, bu barədə iqtisadçı ekspert Eldəniz Əmirov sosial şəbəkə platforması üzərindən analizini paylaşıb. Onun fikirlərinə görə bu qərar İsraillə müqayisədə Türkiyə iqtisadiyyatının özünə daha pis təsir edəcəkdir.

"İsrail 2023-cü ildə 5,4 milyard dollarlıq ticarət həcmi ilə Türkiyənin ixracat siyahısında 13-cü yerdədir. Bununla belə, 2023-cü ildə İsrailə ixrac əvvəlki illə müqayisədə təxminən 23 faiz azalıb. 2024-cü ilin birinci rübündə isə Türkiyənin İsrailə ixracatı 21,6 faiz azalıb. Ümumiyyətlə isə Türkiyə-İsrail ticarət həcmi son 20 ildə 6 dəfə artıb. Hətta Qəzzada əməliyyatların başladığı oktyabr ayında ixrac özündən əvvəlki ilin eyni ayına görə 29 faiz artdı, idxal yüzdə 59 faiz azaldı. 2000-2022-ci illər arasında iki ölkə arasında ticarət balansı həmişə Türkiyənin xeyrinə olub. Hazırladığım şəkildən də göründüyü kimi, Türkiyə ticari münasibətlərdə İsraildən daha çox mənfəət əldə edirdi, nəinki İsrail Türkiyədən. Odur ki, rəsmi Ankaranın bu qərarı İsraillə müqayisədə Türkiyə iqtisadiyyatının özünə daha pis təsir edəcəkdir".

Əkbər Novruz