Vaşinqtonda NATO - nun 75 illiyi ilə bağlı keçirilən sammitdən dərhal sonra iyul ayının 15 - dən etibarən ABŞ "Eagle Partner 2024" Ermənistanla hərbi təlimlər keçirir. Təlimlər ayın 24 - nə qədər davam edəcək. Yeri gəlmişkən nəzərə çatdıraq ki, Ötən ilin sentyabrında da  ABŞ-Ermənistan birgə təlimləri keçirilib. 

Erməni siyasi ekspert İşxan Verdiyan, mövzu ilə bağlı görüşlərini Ednews - a paylaşıb. Onun fikrincə bu fəaliyyətlər əsasən şou və sülhü pozmaq xarakteri daşıyır:

"ABŞ heç vaxt sülh tərəfdarı olmayıb, ilk olaraq bunu qeyd etmək lazımdır. Onların sülh təşəbbüslərinin heç biri real nəticə vermədi. Bu, həqiqi bir dəstək fəaliyyətindən daha çox şou, PR, xalqın gözünü yumaq cəhdidir. Bu təlimlər Ermənistana nə verəcək? Onlar "potensial" təcavüz olacağı təqdirdə Amerikanın Ermənistana hərbi dəstək verəcəyini nəzərdə tuturlar? ABŞ həqiqətən əməkdaşlıq etdiyi ölkələrə dəstək veribmi? Mən belə bir hadisəni xatırlamıram, olubsa da çox kiçik istisnalar halında olub.

Birləşmiş Ştatlar yalnız və müstəsna olaraq öz maraqlarını güdür və bunu heç vaxt unutmaq olmaz. Və onların maraqları ATƏT-in Minsk qrupunun fəal həmsədrləri olduqları dövrdə aydın görünürdü. Minsk qrupunun mövqeyi bəllidir: Ermənistan-Azərbaycan münaqişəsi heç bir zaman bitməməlidir və son təlimlər bu məntiqə rahat şəkildə uyğun gəlir. Əks halda Ermənistan ordusu kimə qarşı döyüşməyə hazırlaşır? ABŞ-ın müttəfiqi Türkiyəyə qarşı? Yoxsa Ermənistanın tərəfdaşları olan İran və Gürcüstana qarşı? Bu hərbi təlimlər kontekstində yalnız Azərbaycan qalır və bu anlayış heç də sülhə kömək etmir".

Əkbər Novruz