“Qızım Nigar şeir də yazır, yazdığı, qələmə aldığı şeirlərə musiqi də bəstələyir. Bir neçə mahnısı var ki, sözü də, musiqisi də özünə məxsusdur. O mənim üçün də “Zəfər marşı” adlı mahnı yazıb. O bu mahnını Tovuz hadisələrindən təsirlənib qələmə almışdı. Vətənpərvər bir insan olduğu üçün hisslərini yalnız sətirlərə köçürməklə insanlara çatdıra bilmişdi. Mənim də bu mahnı çox xoşuma gəldi və müraciət edərək repertuarıma əlavə etdim. Baxmayaraq ki, qızım Bakı Dövlət Universitetinin Beynəlxalq əlaqələr fakültəsini bitirib, bu sahədə fəaliyyət göstərmir, amma bu sahəyə də həvəslidir”.
EDNews.net xəbər verir ki, bunu Moderator.az-a açıqlamasında xalq artisti Nəzakət Teymurova qızı Nigar haqda danışarkən bildirib. O daha sonra əlavə edib:
“Bu sənət gendən, nəsildən gəlir. Nigar gözünü açıb evdə musiqi səsi eşidib, mənim sənətkarlarla məşqlərimi görüb. Gözəl musiqi zövqü var, musiqini anlayır. Yazdığı mahnıları hələ ki, mən oxuyuram. İnşallah ki, bir neçə sənətkara da mahnı təqdim edəcək. Aranjmana verəndən sonra yəqin ki, sizlər də həmin sənətkarların ifasında o mahnıları eşidəcəksiniz” deyə xanəndə bildirib.
Xalq artisti daha sonra Ağdama getmək üçün səbirsizləndiyini də bildirib:
“Bu günlərdə ATV səhər verilişi vasitəsilə ustadım Arif Babayevlə görüşdüm. Təbii ki, Arif müəllimlə tez-tez əlaqə saxlayıram, özüm çox görüşüb, onu narahat etmək istəmirəm. Jurnalist Əli Novruzəliyev bizə Ağdam haqda sual ünvanlayanda Arif müəllim dedi ki, ən böyük arzularımdan biri də elə Nəzakətlə Ağdama ayaq basmaqdır. İnşallah ki, hər şey ustadımın dediyi kimi olar. Ağdamda yenidən həyat qaynayıb-qarışar, yenidən günəş doğar. Biz Arif müəllimgilə, Arif müəllim bizə qonaq gəlib, gedər. İndi bizim yeganə həyata keçməyən arzumuz hələ ki, Ağdamda yaşamamağımızdır. O gün elə də uzaqda deyil”, - deyə xanəndə bildirib.
.jpg)
