Azərbaycanda siyasi partiya rəhbərləri teatrlara, tamaşalara gedirlərmi? Ümumiyyətlə, onlar mütamadi olaraq tamaşalara üz tuturlarmı?
Ednews mövzu ilə bağlı partiya sədrləri ilə sorğu keçirib.
Ana Vətən Partiyasının sədri, deputat Fəzail Ağamalı açıqlamasında bildirdi ki, son vaxtlar diqqətimi cəlb edən elə bir tamaşa olmayıb.
“Yadıma gəlir, bir neçə il əvvəl bir teatra dəvət almışdım. Gedib tamaşaçı kimi iştirak etdim. Təəssüf edirəm ki, tələbəlik və gənclik illərimdə böyük məmnuniyyətlə getdiyim tamaşaları bu günkü tetatr tamaşalarında görmək mümkün deyil. Bu da görünür ki, birbaşa müasir texnologiyanın yüksək səviyyədə inkişafıdır. Teatrımızın o dövrkü korifyeləri də yoxdur. Onların oynadığı tamaşaları indi görmək olmur. Bunun özü də bir reallıqdır. Bu baxımdan son vaxtlar teatrlara getmirəm. Kimə bu sualı ünvanlasanız, mənə elə gəlir ki, bu və ya digər şəkildə mənim verdiyim cavabı verəcəklər”.
Azərbaycan Xalq Partiyasının rəhbəri Pənah Hüseyn axırıncı dəfə hansı tamaşada olduğunu xatırlamadığını dedi:
“Vallah, yadıma düşmür ki, sonuncu dəfə hansı teatra üz tutmuşam. Bir dəfə Pantomima teatrında tamaşada olmuşam. Ondan sonra, sözün düzü getməmişəm. Bu yaxınlarda nəvələrimlə danışmışıq, teatra gedəcəyik. Əvvəllər onları Kukla teatrına aparırdım. Açığı, Covid, koronoavirus, pandemiya bizi teatrlardan uzaq saldı. Pandemiya sənət ocaqlarına çox təsir etdi. İndi-indi canlanma başlayır. Biz də planlaşdırırq getməyi”.
Azad Vətən Partiyasının sədri Akif Nağı bir neçə gün əvvəl tamaşda olduğunu qeyd etdi:
“Bakı Gənclər Mərkəzində, Şirzad Pirallahinin rejissoru olduğu "Zəfər günü"tamaşasına baxdım. Ümumiyyətlə, teatra getməyi sevirəm, amma gedə bilmirəm. İstəyərdim ki, tez-tez gedim. Problemlər çoxdu vaxt ayırmaq olmur”.
AĞ partiya sədri Tural Abbaslının getdiyi son teatr Akademik Mill Dram teatrı olub.
“Sonuncu dəfə Akademik milli dram teatrında tamaşaya getmişdim. İtalyalı yazıçının əsəri idi. Bir qadının taleyindən bəhs edilirdi. Fimi də vardı, tamaşanın adını unutmuşam. Sofi Lorenin rol aldığı bir film olub. Ümumiyyətlə çalışram ki, mütamadi olaraq tamaşalara gedim. Adətən “Gənc tamaşaçılar” teatrına və yaxud da Akademik Milli Dram teatrına gedirəm. Düzdü daha çox “Pantomima”nı sevirəm, amma nədənsə ora az-az gedirəım. Ümumən, düşünürəm ki, teatrlar önəmlidir və Mədəniyyət nazirliyimiz bunu təşfiq etməlidir. Bir də iradım olacaq. Bizim teatrlarda 20 ildən bəri eyni repertuar, bir çox hallarda təkrar tamaşalar olur. Eyni yazarların tamaşaları təkrar-təkrar qoyulur, bircə aktyorlar dəyişir. Mən ondansa daha yeni, daha fərqli tamaşaları qoyulmağının tərəfdarıyam. Sevirəm teatrları, tamaşaları və vaxt tapdıqca gedirəm”.
Oğuz Ayvaz