“37 ildir ki, bu sənətdəyəm. Bu illər ərzində heç kimin qarşısında gözü kölgəli olmamışam. Amma son dönəmlər elə çətin məqamlar olur ki, məcbur olub yaxın bildiklərimə utana-utana ağız açıram”.

Bu fikirləri Ednews-a açıqlamasında müğənni Nurlan Əzizbəyli deyib. Xatırladaq ki, bir müddət əvvəl müğənninin dostları sosial şəbəkələrdə onun durumunun ağır olması ilə bağlı çağırış ediblər. Onlar imkanlı şəxsləri N.Əzizbəyliyə kömək etməyə səsləyiblər.

Bu fikirləri təsdiq edən müğənni hazırda heç bir yerdən qazancının olmadığını vurğulayıb.

“Yaşayışım, şəraitim çox pisdir. Heç yerdən evimə qazanc gəlmir. Əvvəllər işlərim olurdu, indi isə tam sakitçilikdir. Heç çür dolana bilmirəm. Çox acınacaqlı durumdayam, heç bir yerdən dəstəyim yoxdur. Övladım bu il universitetə qəbul olunacaq, evdə isə yalnız məndən qazanc gəlir”.

Nurlan Əzizbəyli səhhətində yaranan problemlərdən də danışıb. O, qeyd edib ki, yanvar ayında əmaliyyat olunub.

“Bu ilin yanvar ayında əməliyyat olunmuşam. Hazırda səhhətimdə heç bir problem yoxdur, hər ay həkim müayinəsindən keçirəm. Əgər vaxtı-vaxtında müayinə olunmasam, saçlarım və dişlərim tökülə bilər”.
Qeyd edək ki, müğənni Nurlan Əzizbəyli Xalq artisti Ramiz Əzizbəylinin qardaşı oğludur.

Aynurə Mustafayeva