Bu gün Milli teatrımızın yaranmasından düz 150 il keçir.
Hazırda Azərbaycan teatrları üçün xarakterik olan problemin həlli yolları ciddi müzakirə mövzusudur. Niyə yeni teatrlar yaranmır? Teatrlarda olan vəziyyət necədir? Hazırda olan teatrları qənaətbəxş hesab etmək olarmı?
Mövzu ilə bağlı Ednews-a danışan teatrşünas Məryəm Əlizadə açıqlamasında bildirib ki, bu, bizim tariximizdə ciddi dəyəri olan gündür.
“ Milli teatrımızın yaranmasından 150 il keçir. Hazırda ölkəmizdə 26 dövlət teatrı fəaliyyət göstərir. Çox sayda özəl teatrlar açılır. Bu son dərəcə sevindirici haldır”.
Teatrşünas bu gün gənclərin fəaliyyətindən də söhbət açıb.
“ Bu gün yeni nəsil teatra can vermək üçün əllərindən gələni edirlər. Neçə-neçə gənc bu gün bu sənətə işıq yandırmaq üçün öz teatrını açır. Azərbaycanda teatra diqqət yüksək səviyyədədir. Çünki teatr elə bir sahədir ki, dövlətin qayğısı olmadan fəaliyyətinə davam etməsi çox çətin olar. Neçə dövlət teatrı təmir olunub. Bir çox bölgələrimizdə teatr binaları yüksək səviyyədə təmir olunub”.
O həm də bildirib ki, bu gün ölkədə sənət adamlarına verilən diqqət göz önündədir.
“Teatrlarımızda olan bu gün tamaşaçı çoxluğunu hamımız müşahidə edirik. Bu tamaşaçılar arasında hər yaş kateqoriyasına aid şəxs tapa bilərsiniz. Teatr cəmiyyətin bir güzgüsüdür. İnsan burada öz qüsurlarını görür”.
M. Əlizadə teatrlra olan narazılıqlarla bağlı məsələlərə də aydınlıq gətirib.
“Hər il teatrlarla bağlı müəyyən narazılıqlar bildirilir. Amma, mən bunula razılaşmıram. Bu gün teatr özünün ən yaxşı dövrünü yaşayır. Neçə nəfər gənc teatrda fəaliyyət göstərir. Bu da yeniliklərin bizim teatrlara yol açmasını göstərir. Teatr necə olmalıdır ki?
Xarici ölkələrə getmişik. Neçə dəfə oradakı teatrların fəaliyyətinin şahidi olmuşuq. Bizim teatrımız dünya teatrının bir qolu kimi öz fəaliyyətini davam etməlidir”.
Ayan Rzayeva