“Azərbaycan Ümümdünya Ticarət Təşkilatına (ÜTT) daxil olarsa, mal idxalına çox ciddi problem yarada bilər”.

Bu sözləri Eurasia Diary-ə açıqlamasında iqtisadçı deputat Vahid Əhmədov Azərbaycanın ÜTT-yə üzv qəbul olunmamasına münasibət bildirərkən deyib.

“Bu məsələ uzun müdətdir müzakirə obyektidir. Bilirsiniz ki, dövlət başçısı cənab İlham Əliyevin sərəncamına uyğun olaraq xüsusi komissiya da yaradılıb. Xarici İşlər nazirinin müavini komissiyaya rəhbərlik edir və müəyyən dövlətlərlə danışıqlar aparılır, protokollar imzalanır ki, Azərbaycan ümumiyyətlə təşkilata daxil olsun. Biz də Azərbaycanın Ümumdünya Ticarət Təşkilatına daxil olmağının tərəfdarıyıq. Və mütəmadi olaraq müzakirələr zamanı bu məsələyə toxunuruq. Ancaq bəzi məsələlər var ki, bu məsələlər əlbəttə Azərbaycanın daxili bazarının qorunmasıdır. Bunun üçün də müəyyən güzəştlər olmalıdır. Bəzi dövlətlər bu təşkilata daxil olanda, onlara 3-5 il müddətində güzəştlər olur. Çünki gömrük tarifləri məsələsi var. Bu tariflərin qəbul edilməsi Azərbaycana mal idxalında çox ciddi problemlər yarada bilər və Azərbaycanın daxili bazarına təsir edə bilər. Ona görə bu danışıqlar gedir. Ancaq Avropa Şurası, Avropa dövlətləri də Azərbaycanın Ümumdünya Ticarət Təşkilatına daxil olmağını istəyirlər, hətta bizim sazişin imzalanması bu məsələdə bir balaca ləngiyir. Mən bir iqtisadçı olaraq hesab edirəm ki, Azərbaycan Ümumdünya Ticarət Təşkilatına nə qədər tez daxil olarsa, bir o qədər Azərbaycanda müəyyən problemlər aradan qalxmış olar”.

Vahid Əhmədov Beynəlxalq Münasibətlərin Təhlili Mərkəzinin (BMTM) eksperti Orxan Bağırovun "Azərbaycan hələ ki, ÜTT-yə qoşulmaq niyyətində deyil, çünki bu, ölkəyə xarici təsirləri artırmaqla, siyasi və iqtisadi sabitliyi poza bilər” fikrinə də münasibət bildirib.

“Mən ona inanmıram. Azərbaycan kifayət qədər sabit dövlətdir. 28 ildir ki, biz müstəqil, oturuşmuş dövlətik. Azərbaycan son 15 ildə kifayət qədər özünə beynəlxalq aləmdə dostlar da tapıb, öz iqtisadi və siyasi hərbi mövqeyini də gücləndirib. Mən inanmıram ki, Ümumdünya Ticarət Təşkilatına üzvlük bizim üçün ciddi problem yaratsın. Ancaq bir şərtləki daha öncə qeyd etdiyim kimi, Azərbaycan bu təşkilata daxil olanda 3-5 il müddətinə müəyyən güzəştləri tələb etməlidir”, - deyə Vahid Əhmədov bildirib.

Vəfa Vəli