Azərbaycan bankları xarici vətəndaşlar üçün niyə bu qədər cəlbedicidir? İqtisadçı-ekspert mühüm məqamları açıqladı
Bu ilin ikinci yarısına olan məlumata görə, xarici ölkə vətəndaşlarının Azərbaycan banklarındakı əmanəti 802.7 milyon manat olub.
Mərkəzi bank qeyd edir ki, bu əmanətlərin 216 milyon manatı milli valyuta, 586.7 milyon manatı isə xarici valyuta şəklində yerləşdirilib.
Xarici ölkə vətəndaşlarının öz əmanətlərinin təhlükəsizliyi üçün Azərbaycan banklarına müraciət etməsi maraq kəsb edən məsələlərdən biridir.
İqtisadçı-ekspert Elman Sadıqov Ednews - a vediyi açıqlamasında qeyd edib ki, Azərbaycan banklarına maraq göstərən xarici vətəndaşlar arasında Rusiya, Ukrayna, Türkiyə və digər ölkələrin vətəndaşı olan azərbaycanlılar çoxluq təşkil edir.
“İlk növbədə nəzərə çatdırım ki, Azərbaycan banklarına depozit üçün müraciət edən xarici vətəndaşların bir hissəsi ölkəmizdə müxtəlif şirkətlərdə işləyən şəxslərdir. Onlar əldə etdikləri vəsaitlərin saxlanılmasını və qorunmasını bizim banklara əmanət edirlər. Statistika, həmçinin göstərir ki, xarici ölkələrin vətəndaşı olan azərbaycanlılar da öz ölkələrində qazandıqları vəsaiti Azərbaycan banklarda əmanət kimi qoyurlar. Onlar düşünürlər ki, öz doğma ölkəsinin bankları onlar üçün daha münasib və sərfəli olar. Üçüncü amilə gəldikdə isə bir sıra xarici ölkələrin vətəndaşları var ki, onlar üçün Azərbaycan banklarında dollardan olan əmanətlər üzrə faiz dərəcələri açığı cəlbedicidir. Çünki bildiyimiz kimi, hazırda bir çox Avropa ölkələrinin banklarında dollardan qoyulan əmanətlər üzərində mənfi faiz dərəcələri tətbiq edilir. Məsələn, əgər hər hansı Avropa bankında yüz min dollar əmanətin saxlanılması və qorunması üçün illik 500 və 1000 dollar arası, yəni 0.5 % həcmində pul ödəməlisən. Bu da bir çoxlarına sərf eləmir”.
E.Sadıqovun sözlərinə görə, xarici vətəndaşlar mənfi faiz dərəcəsindən qaçmaq, maliyyə itkilərinə məruz qalmamaq, uduzmamaq üçün daha cəlbedici olan Azərbaycan banklarına əmanət yatırmağa üstünlük verirlər.
“Elə Azərbaycan bankları var ki, orada faiz dərəcələri minimuma düşüb. Həmin banklarda dollardan olan əmanətlər üzrə faiz dərəcələri 0.15%, 1.00% və 1.15% dərəcəsi ətrafındadır. Manatdan olan əmanətlər üzrə faiz dərəcələri isə nisbətən daha yüksək, yəni 7% və ya 8.5% səviyyəsindədir. Üstəgəl manatın kursu stabil olaraq qalır. Hər bir valyutanın faiz dərəcəsi yüksək olduqda, həmin valyutaya diqqət daha çox artır. Yəni, həmin valyutada əmanət qoyurlar, həmin valyutadan pul qazanmağa çalışırlar”.
Yunis Abdullayev
