“2023-cü il dünya iqtisadiyyatı resessiya təhlükəsi ilə üzləşə bilər. Əsas problem dünya iqtisadiyyatının daralması problemidir. ABŞ-da başda olmaqla dünya ölkələri federezerv sistemi, inflyasiya ilə mübarizəyə görə uçot dərəcələrini kəskin artırırlar”.
Bu sözləri Ednews-a iqtisadçı-ekspert Natiq Cəfərli bildirib. O, qeyd edib ki, kreditlər bahalaşdıqca kredit verən bankların və eyni zamanda müştərilərin sayı azalır, yeni iş yerləri yaranmır və nəticə etibarilə tələb aşağı düşdükcə təklifin də azalması, yəni iqtisadi daralma baş verir.
“Bu tendensiyanın istər-istəməz Azərbaycana da təsirləri olacaq. Dünya iqtisadiyyatında baş verən proseslərin dolayısı ilə bizə də təsirləri var. Bizə təsir edən amillərdən ən vacibi təbii ki, enerji daşıyıcıları məsələsidir. Əgər doğrudan da dünyada iqtisadi resessiya olsa, neft qiymətlərinin ucuzlaşması baş verə bilər. Necə ki biz ilin sonunda bunu müşahidə edirik. Yay aylarında 130 dollara qədər bahalaşan neft indi 85 dollara qədər ucuzlaşıb".
Ekspertin sözlərinə görə Azərbaycanda əvvəllər də ərzaq bahalaşmaları olan zaman bu, sərhəd bölgələrində yaşayan əhaliyə o qədər də təsir göstərmirdi, çünki onlar qonşu ölkələrə, məsələn, Cənub rayonlarında yaşayan əhali İrandan, Qərb rayonlarında yaşayan əhalinin böyük bir qismi Gürcüstandan daha sərfəli qiymətə ərzaq əldə edə bilirdilər. Ancaq iki ildir ki, quru sərhədlərinin qapalı olması həmin bölgələrdə yaşayan əhalinin, necə deyərlər, əl-qolunu bağlayıb.
"Azərbaycanda ərzaq iflyasiyasının çox ciddi sürət almasının hamımız şahidi oluruq. Rəsmi rəqəmlərdə də artıq 22-23 faizə çatıb ərzaq inflyasiyası. Bu, çox ciddi rəqəmdir və Azərbaycan üçün çox ciddi problemdir. Gömrük rüsumları və vergi dərəcələri azaldılmasa, təəssüf ki, Azərbaycanda inflyasiyanı azaltmaq mümkün olmayacaq. Ona görə də düşünürəm ki, Azərbaycanda əlavə dəyər vergisinin və gömrük rüsumlarının azaldılmasına ehtiyac var. Gömrük rüsumları ümumiyyətlə, ləğv edilə də bilər. Bütün bu addımlar əticə etibarilə inflyasiyanın aşağı düşməsində mühüm rol oynayar".
Oğuz Ayvaz
