Milli Məclisin deputatı Azay Quliyev əlilliyi olan, sosial təminata ehtiyacı olan xüsusi kateqoriyalı şəxslərə güzəştli şərtlərlə daha aşağı faizlə kredit verilməsini təklif edib.
Bu barədə iqtisadçı ekspert Əkrəm Həsənov Ednews-a açıqlamasında bildirib ki, bank özəl qurumdur və hər hansı sosial öhdəliyi yoxdur:
“Bank krediti digər vətəndaşların və sahibkarların əmanətlərindən verir. Bank üçün əsas olan verdiyi kreditin vaxtında qaytarılmasıdır. Çünki o da əmanətçinin qoyduğu məbləği geri qaytarmalıdır. Əlbəttə, hər bir bank özü üçün müstəqil şəkildə hər hansısa güzəştlər müəyyən edə bilər, lakin onlardan bunu tələb etmək olmaz”.
Ekspert bildirib ki, bu problemin həllində dövlət maraqlı olmalıdır. Onun sözlərinə görə, sosial yardıma ehtiyacı olan insanlara yüksək təqaüd ayrılmalı, güclü maddi dəstək göstərilməlidir ki, onların bank kreditlərinə, güzəştlərinə ehtiyacı olmasın:
“Bu fikri irəli sürən kimi məmurlar deyəcək ki, hardan, necə təmin edək bu kateqoriya insanları? Çox sadə. Böyük sahibkarların, məmurların çox sayda obyektləri, böyük gəlir gətirən əmlakları, villaları var. Onlara yüksək səviyyədə vergilər müəyyən olunmalıdır. Bu gün ölkədə vergi məsələlərində fərq qoyulmur. Malikanəsi olan da, daxmada yaşayan da eyni qədər vergi ödəyir. Bu, ədalətli deyil. Qabaqcıl ölkələrdə vergi ödənişləri başqa cür tənzimlənir. Əmlakı çox olan çox vergi ödəyir. Bunun hesabına da sosial yardımlar yüksək səviyyədə həyat keçirilir. Bizdə də bu üsul tətbiq edilməlidir”.
Törə Zeynallı