Azərbaycanda sahibkarlara yeni güzəştlər ediləcək. 2024-cü ildə sahibkarların yoxlanılması 1 il müddətində uzadılacaq. Bu Azərbaycanda özəl sektorun inkişafına necə təsir edəcək?

Məsələ ilə bağlı Ednews-a danışan iqtisadçı ekspert Elşən Bağırzadə bildirib ki, yoxlamaların məhdud sayda ləğv edilməsi ölkədə özəl sektorun dirçəldilməsi məasədi ilə həyata keçirilib.

“Sahibkarlıq sahəsində yoxlamaların dayandırılması müddəti daha 1 il artırılır. Müəyyən yoxlamalar istisna olunmaqla digər bütün yoxlamalar 2024-cü ildə də dayandırılacaq. Bu müəyyən edilmiş məhdudiyyətlər nəzərə alınmaqla bu müddətdə yalnız vergi yoxlamaları, maliyyə bazarları sahəsində aparılan yoxlamalar, gömrük auditi, müvafiq icra hakimiyyəti orqanı tərəfindən özəl tibb fəaliyyətinin subyektlərində aparılan yoxlamalar, eləcə də dərman vasitələrinin keyfiyyəti, təhlükəsizliyi qaydalarına riayət edilməsi və qida məhsullarının təhlükəsizliyinə nəzarətin həyata keçirilməsi ilə bağlı yoxlamalar, yanğın nəzarəti, tikintiyə dövlət nəzarəti, təhlükə potensiallı obyektlərin və dağ-mədən sahələrinin təhlükəsiz istismarına nəzarət və radiasiya təhlükəsizliyinə nəzarət sahəsində yoxlamalar davam etdirilə bilər. Yoxlamaların 1 il ərzində uzadılmasının əsas səbəbi yerli sahibkarların imkanlarını artırmasına şərait yaratmaqdır. Beləliklə, ölkədə özəl sənaye sahələri və ticarət inkişaf edə bilər.

Digər mühüm məqam qanunvericiliyə daha öncə ediləm dəyişikliklərə əsasən, yoxlamaların dayandırıldığı müddət başa çatdıqdan sonra da həmin dövrdəki fəaliyyətlə bağlı yoxlamaların aparılmasının qadağan edilməsidir. Yəni, yoxlamaların qadağan edildiyi müddət bitdikdən sonra sahibkarın yoxlamaların qadağan edildiyi dövr üçün fəaliyyəti yoxlanılmayacaq. Təbii ki, bu zaman icazə verilən yoxlamalar üzrə fəaliyyətlər istisna ediləcək”.

Fərid Axund