Qazaxıstanda Azərbaycanın təşəbbüsü ilə türk dünyası markalarını birləşdirən “Made in Turan” brendi yaradılıb.
Azərbaycan Françayzinq Assosiasiyasının İdarə Heyətinin sədri Camid Mövsümov bu brendin yaradılmasının türk ölkələri arasında vahid ticarət markası yaradacağını bildirib. O, qeyd edib ki, bu yolla istehsal edilən və dünya bazarına çıxan məhsullara qarşı maraq artacaq.
“Bu təşəbbüsün həyata keçirilməsi çox yaxşıdır. Sadəcə bunun nəticələri bu ticarət prosesinin icrasından sonra bilinəcək. Məsələ burasındadır ki, bu istehsal edilən məhsullar nə qədər keyfiyyətli olacaq, nə qədər dünya standartlarına cavab verəcək və ticarətə necə təşviq ediləcək. Bunlar hamısı bu məhsulların satılmasına təsir edəcək.”
Bu fikirləri Ednews-a müsahibəsi zamanı bildirən, iqtisadçı ekspert Rəşad Həsənov bu təşəbbüsün Türk dünyasında həmrəyliyi simvolizə etdiyini bildirib:
“Bu təşəbbüs özü bir həmrəylik göstəricisidir. Məhsulların “Turan” markası altında satılması Türk dünyasının prestij qazanmasına təkan verə və bazar prestiji yarada bilər. Türkdilli ölkələrin eyni marka adı altında məhsul ixrac etməsi istehsal edilən malların bazar miqyasından faydalanmasına kömək edə bilər. Beləliklə, Türk ölkələrinin məhsulları bazarda böyüyə və təkminləşə bilər.
Buna baxmayaraq, bütün bunlar hələ ki, xoş niyyətdir. Nəticənin effektini icradan sonra görəcəyik.”
Türk dövlətlərində istehsal olunan məhsulların dünya bazarında güclü yerə sahib olması üçün bu ölkələrdə potensial var?
“Türk dövlətlərində ucuz işçi qüvvəsi və resurslar baxımından yetəri qədər potensial var. Eyni zamanda yeyinti sənayesinin nisbətən zəif inkişaf etməsinin təzadlı olsa da, yaratdığı müəyyən üstünlüklər var. Mələsən, məhsulların daha orqanik tərkibinin daha çox olması baxımından. Sadəcə olaraq, bu məhsulların bazarlara təqdimatı məsələsi də olduqca önəmlidir. Bazarlarda təchizat zəncirindən daha səmərəli şəkildə istifadə edilməsi və beynəlxalq sertifikatların alınması və s. Müasir texnologiyalardan kifayət qədər istifadə olunması da bu məhsulların bazarda özünə yer tapmasına kömək edəcək.”
Fərid Axund