Hobbi bir çox qadın üçün depressiya və stresdən xilas olmağın yeganə çıxış yoludur. Bundan əlavə, sevimli məşğuliyyət onlara özlərindəki istedadı üzə çıxarmağa, özünə inam hissini oyatmağa təkan verir.
Ednews ictimai rəy sorğusuna əsasən qadınlar arasında geniş yayılmış hobbiləri təqdim edir:
Yemək bişirmək…
Bu ən aktual və geniş yayılmış qadın hobbisidir. Zərif cinsin nümayəndələri yemək bişirməyi, kulinariya nümunələrindən sənət əsərləri yaratmağı çox sevir. Beləliklə, bu məşğuliyyət təkcə ailə üzvlərini deyil, eləcə də ev yeməklərinin satışı sayəsində başqa insanları sevindirir.
Rəqslər...
Buraya həm bal, həm də müasir rəqslər aid edilə bilər. Bədən dilinin köməyi ilə həm müsbət, həm də mənfi bütün emosiyaları ötürmək mümkündür. Rəqslə məşğul olmaq isə buna olduqca böyük təkan verir, belə ki, rəqs duruşu yaxşılaşdırır və insanın əhval-ruhiyyəsini yüksəldir.
Vokal ...
Musiqisevərlər üçün vokal dərsləri ən yaxşı məşğuliyyət hesab edilir. Bu işlə məşğul olmaq üçün isə istedad və istək vəhdət təşkil etməlidir. İnsan özünü bütünlüklə bu prosesə həsr etdikdə bütün problemlər arxa plana keçir, bu isə özlüyündə müsbət enerjiyə köklənməyə səbəb olur.
Kitab oxumaq...
Bu məşğuliyyət yaddaşı inkişaf etdirir, dünyagörüşü genişləndirir və insan fikirlərini süjetə cəmləyərək, fantaziyaların inkişafına yol açır. Maraqlı bir kitabla təkbətək qalmaq insana hər zaman məmnunluq gətirir.
Əl işləri...
Əllə hazırlanmış istənilən əşya və ya geyim hər zaman tələbat və populyarlıq qazanıb. Şam, sabun, çanta, yastıq hazırlamaq, tikmə, toxuculuq - bütün bunlar qadına qayğılardan qaçmağa və əl əməyinin maraqlı dünyasına daxil olmağa imkan verir. İncəsənətin bu növünün nümunələri sərgilərdə təqdim olunmaqla yanaşı, evlərimizi də bəzəyir. Bu isə gəlir gətirməklə yanaşı göz oxşayır.
Yoqa, qaçış...
Bu məşğuliyyətlər mütləq öz dünyanıza qaçmağa və öz düşüncələrinizlə tək qalmağa kömək edəcək. İdman həm də gözəl formada qalmağa kömək edir. Bədənə elastiklik verməklə yanaşı, ruhu inkişaf etdirir, qadını daha gözəl və zərif edir.
Rəssamlıq və fotoqrafiya...
Yaradıcı insanlar üçün istər rəssamlıq, istərsə də fotoqrafiya ən uyğun seçim sayıla bilər. Bu işlə məşğul olmaq insana güclü emosional yüksəliş yaşadır. Bu, özünüzü ifadə etməyin və yaradıcılığı ortaya qoymağın bir üsuludur.
Sözsüz ki, bütün qadınların asudə vaxtı olmur, lakin hər hansı hobbi ilə məşğul olmadan həyat darıxdırıcı və maraqsız ola bilər. Bununla belə, zərif cinsin nümayəndələrinin eyni anda bir neçə işi görmə qabiliyyətinə malik olduğunu unutmaq olmaz.
İstənilən halda hobbi seçimində qərar verərkən hər zaman yeni və qeyri-adi məşğuliyyətləri sınamaq tövsiyyə olunur. Bəlkə də bir gün seçdiyimiz hobbi həyatımızın məşğuliyyətinə çevriləcək.
Ülviyyə Fərhad