Məşhur holland rəssamı Vinsent Van Qoqun əvvəllər avtoportreti rəssamın başqa bir rəsminin arxasında təsadüfən tapılıb.
Ednews xəbər verir ki, Milli Şotlandiya Qalereyasının mütəxəssisləri sərgidən əvvəl rentgen yoxlanışından keçirdikləri əsərdə avtoportret müəyyən ediblər.
“Kəndli qadının başı” kimi tanınan əsərin arxasındakı avtoportret karton və yapışqan təbəqələri arasında gizlənib. Qalereyanın baş eksperti Lesley Stevenson rəssamın onlara "baxdığını" görəndə təəccübləndiklərini bildirib.
Stivenson həmçinin bunun böyük bir kəşf olduğunu və bu avtoportretin Van Qoqun həyatı haqqında bildiklərimizə yeni bir parça əlavə etdiyini bildirib.
Qeyd edək ki, hollandiyalı rəssam pula qənaət etmək üçün işlənmiş kətanları təkrar istifadə edirdi.
Van Qoq incəsənət tarixinin ən nüfuzlu və məşhur simalarından biridir. Onun əsl şöhrəti 1890-cı ildə 37 yaşında vəfat etdikdən sonra yayılıb.
.png)
Kəndli Qadının başı 1960-cı ildə Edinburqun aparıcı hüquqşünaslarından birinin hədiyyəsi olaraq Şotlandiya Milli Qalereyasına verilib. Rəsmdə Van Qoqun 1883-1885-ci illər arasında yaşadığı Hollandiyanın cənubundakı Nuenen şəhərindən olan bir qadın təsvir edilib. Əsər 1951-ci ildə Şotlandiyaya gətirilərək “Alexander and Rosalind Maitland” kolleksiyasına daxil edilib. “Kəndli qadının başı” daha sonra Milli Qalereyaya bağışlanıb.
Hazırda isə rentgen şüalarının aşkar etdiyi avtoportretin orijinal əsərə xələl gətirmədən necə sərgilənəcəyi maraq doğurur. Bildirilir ki, Edinburq sərgisinə gələnlər əsərin rentgen versiyasını görə biləcəklər.
