Bəşəriyyətin üzləşdiyi ən aktual problemlərdən biri ətraf mühitin çirklənməsidir. Bir sıra ölkələrdə ətraf mühit məsələlərinə çox ciddi yanaşılır, hətta dövlət proqramları həyata keçirilir.
Ednews dünyanın ən yaxşı və ən pis ölkələrinin ekologoiyaları ilə bağlı məqaləni təqdim edir.
Finlandiya 12% çirklənmə ilə ən yaxşı ekologiyaya sahib ölkələr sırasında birinci yerdədir. Avropanın şimalında Baltik dənizi sahilində yerləşən bu ölkədə orta ömür uzunluğu da qənaətbəxşdir. Təsadüfi deyil ki, Finlandiya dünyanın ən xoşbəxt ölkəsi hesab olunur.
Atlantik okeanının şimal hissəsində yerləşən ada dövləti İslandiya 15.2% çirklənmə ilə yaxşı ekologiyaya malik dövlətlərdən hesab olunur. Vulkanların püskürməsi nəticəsində əmələ gələn və özünəməxsus ekzotik təbiətə malik olan bu ölkə göz oxşayır.
Hündür dağları, dərin körfəzləri, çayları və şəlalələri ilə tanınan Norveç də 17.7% göstərici ilə bu siyahıda üçüncü sırada öz yerini alır. Bu ölkə saf gözəlliyi ilə dünyanın müxtəlif yerlərindən milyonlarla turisti özünə cəlb edir.
Estoniya 17.9% çirklənmə ilə dördüncü yerdə gəlir. Şimali Avropanın Baltik regionunda yerləşən bu dövlətin ərazisinin dörddə üçü meşə və bataqlıqlardan ibarətdir. Havası dünyanın ən təmiz havalarından biridir.
2023-cü il üzrə “çirklənmə indeksi” hesabatında İsveç 18%-lik göstərici ilə beşinci sıradadır. Şimali Avropada Skandinaviya yarımadasında yerləşən bu ölkə təbiəti, zəngin bitki örtüyü, gözəl dağ mənzərələri və gölləri ilə görənləri valeh edir.
Şərqi Asiyada yerləşən Monqolustan isə, təəssüf ki, ekoloji baxımdan heç də yaxşı vəziyyətdə deyil. Belə ki, 2023-cü il üzrə “çirklənmə indeksi” hesabatında 92.4%-lik çirklənmə ilə ilk sıradadır.
Cənub-şərqi Asiyada yerləşən Myanma dövləti də, 89.8%-lik çirklənmə göstəricisi ilə bu sıralamada ikinci yerdədir.
Qərbi Asiyada yerləşən Livan Respublikasının flora və faunası zəngin olsa da, heyif ki, 89.4% çirklənməyə məruz qalıb. Belə ki, bu sırada 3-cü yeri tutur.
Cənub sahilləri Qvineya körfəzinin suları ilə əhatə olunan Qana Respublikasının təbiəti 88.3% çirklənməyə məruz qalıb. Qərbi Afrika yerləşən bu dövlət 2023-cü il üzrə “çirklənmə indeksi” hesabatına görə ən çirkli ekologiyaya sahib 4-cü ölkədir.
Nigeriya və ya rəsmi adı ilə Nigeriya Federativ Respublikası Qərbi Afrikada yerləşən və çirkli ekologiyaya sahib olan ikinci ölkədir. Belə ki, burada çirklənmə faizi 88%-dir.
Qeyd edək ki, 2023-cü il üzrə “çirklənmə indeksi” hesabatına görə Azərbaycan 73.9% çirklənmə ilə təmiz ekologiyaya sahib ölkələr arasında 85-ci, çirkli ekologiyaya sahib ölkələr arasında isə 27-ci sıradadır.
Mehri Ağayeva
