CNN media şəbəkəsinin ərəbcə bölməsi Azərbaycan haqqında geniş xəbər hazırlayıb.  

Ednews bildirir ki, xəbərdə Azərbaycanın növbəti dəfə “Formula 1” Qran Prisinə ev sahibliyi etməsi ilə ölkəyə artan turist axınına diqqət çəkilib. Bildirilib ki, Qafqazın mərkəzində yerləşən paytaxt Bakı maraqlı turizm marşrutları ilə hər il daha çox xarici qonağı özünə cəlb edir.

Qeyd edilib ki, Azərbaycan ilin bütün fəsillərində turistlərin maraqlı vaxt keçirməsi, aktiv əyləncələrlə məşğul olması, eyni zamanda, tarixi və mədəni zənginlikləri kəşf etməsi üçün geniş imkanlara sahibdir.

Xəbərdə ölkənin füsunkar təbiəti, saf gözəlliklərindən danışılıb. Bildirilib ki, “hiking” həvəskarları üçün burada yüksək dağ zirvələri, uzun cığırlar var.

“Həmçinin, Azərbaycan Cənubi Qafqaz ölkələrini birləşdirən piyada turizm şəbəkəsinə qoşulub. Qara dənizdən Xəzər dənizinə qədər uzanan “Transqafqaz cığırı” ilə hərəkət edən turistlər ölkənin təbiətindən və bioloji müxtəlifliyindən həzz ala, qədim qala və bürcləri, tarixi və dini abidələri görə, eyni zamanda müxtəlif bölgələrin insanları ilə ünsiyyət quraraq Azərbaycan xalqının yüksək qonaqpərvərlik ənənənlərinin şahidi ola bilərlər”.

Xəbərdə paytaxt Bakının qədimliklə müasirliyin vəhdəti olduğu vurğulanıb. Bildirilib ki, turistlər İçərişəhərin daş döşəməli küçələrini gəzə-gəzə sənətkarların emalatxanalarını ziyarət edə, müxtəlif kafe və muzeylərə, həmçinin, YUNESCO-nun ümumdünya mədəni irsi siyahısına daxil edilmiş Qız Qalası və Şirvanşahlar Sarayına baş çəkə bilərlər.

“Məşhur Alov Qüllələri və İraq əsilli britaniyalı memar Zaha Hadidin layihələşdirdiyi Heydər Əliyev Mərkəzi şəhərin müasir memarlıq simvollarındandır”.

Qızmar istilərin hakim olduğu yay aylarında isə turistlərə Xəzərin mavi sularına baş vurmaq tövsiyə olunur.  

“Çimərlik istirahətinə alternativ axtaranlar isə ölkənin digər bölgələrində təmiz və sərin dağ havası, əsrarəngiz təbiət mənzərələri və sıx meşələrdən həzz ala bilərlər”.  

Xəbərdə Qobustan qayaüstü rəsmləri barədə də məlumat verilib. Bildirilib ki, Bakının cənubunda yerləşən Qobustanda UNESCO-nun Ümumdünya İrs Siyahısına daxil edilmiş 6 mindən çox petroqlif var ki, onlardan bəzilərinin yaşı 15 min ildən çoxdur.

“Qaya rəsmlərində qədim insanların məşğuliyyətləri – ovçuluq sənəti, rəqs səhnələri və s. həkk olunub. Bunlar eramızdan əvvəl bu yerlərdə sivilizasiyanın varlığını, Azərbaycanın qədim yaşayış məskənlərindən biri olduğunu sübut edir”.

Ölkədə şərab istehsalının inkişaf etdiyi və Azərbaycanın özünəməxsus şərabçılıq ənənələrinin olduğu da diqqətə çatdırılıb.  

“Azərbaycan bu içkinin istehsalı ilə məşğul olan ən qədim yerlərdən biridir. Belə ki, burada üzüm yetişdirilməsinin tarixi min illərə gedib çıxır. Üzümlər payızın əvvəlində yığılır. Ona görə də bu fəsil ölkənin şərab zavodlarını ziyarət etmək üçün ideal vaxtdır”.

Yazıda, həmçinin, hər ilin oktyabrında Göyçay rayonunda keçirilən“Nar Bayramı” haqqında da məlumat verilib.  

“Nar Azərbaycan mətbəxində mühüm yer tutur. Bu meyvə məhsuldarlıq, sevgi və ölümsüzlük rəzmi sayıldığına görə, azərbaycanlılar üçün dərin mənası var”.  

Xəbərdə qeyd olunub ki, ilin digər fəsilləri kimi qışda da turistlər Azərbaycanda əyləncəli vaxt keçirə bilərlər.

“Şahdağ qış turizmi kurortu cəsarətli xizəkçilər və qış tətilini Azərbaycanda keçirmək istəyənlər üçün ideal yerdir”.

Sonda oxucular Azərbaycanda olan palçıq vulkanları barədə də məlumatlandırılıb:

“”Odlar Yurdu” kimi tanınan Azərbaycan dünyada nadir rast gəlinən palçıq vulkanlarının vətənidir. Burada dünyanın ən böyük palçıq vulkanı da daxil olmaqla 400-dən çox palçıq vulkanı var. Radioaktiv maddələrdən ibarət müalicəvi palçıq vannası qəbul etmək sağlamlığının keşiyində duranlar üçün əvəzedilməz metoddur”.

Törə Zeynal