Rusiya-Azərbaycan parlamentlərarası dostluq qrupunun rəhbəri Dmitriy Savelyev Azərbaycanda keçiriləcək seçkilərin əhəmiyyəti və Xəzəryanı bölgədə sabitliyin qorunub saxlanması ilə bağlı sechki-2018.az saytının suallarını cavablandırıb.
- Aprelin 11-də Azərbaycanda prezident seçkiləri keçiriləcək, xalq yeni müddətdə ölkəyə rəhbərlik edəcək şəxsi seçəcək. Siz Azərbaycanda seçkiöncəsi mühiti necə dəyərləndirirsiniz?
- Azərbaycan cəmiyyəti hər zaman ölkədə baş verən hadisələrə məsuliyyət hissi ilə yanaşır. Bu mənada budəfəki seçkilərdə də iştirakın yüksək səviyyədə olacağına əminəm. Əhval-ruhiyyəyə gəlincə, dünyada neftin qiymətinin ucuzlaşmasından qaynaqlanan çətin dövrü Azərbaycan uğurla geridə qoydu. İqtisadiyyatın qeyri-neft sektorunda, o cümlədən ağır sənaye, kənd təsərrüfatı, turizm sahələrində ciddi artım müşahidə olundu ki, bu da durğunluğun qarşısını aldı. Bu, Azərbaycana sosial layihələrin reallaşdırılmasını davam etdirməyə imkan verdi. Nəticədə ötən il Azərbaycanda ÜDM-də artım oldu, ölkənin valyuta ehtiyatları 4.5 milyard dollar artaraq 44 milyard dollara çatdı. Bu, isə çox yaxşı göstəricidir. Hazırda neftin qiyməti yenə bahalaşıb, amma “qara qızıl” təkrar ucuzlaşsa belə, Azərbaycan yenə də inkişaf edəcək. Aydın görünür ki, iqtisadiyyatın şaxələndirilməsi, qeyri-neft sektorunun inkişafı siyasəti düzgün seçim idi. Ümumiyyətlə, Azərbaycanın beynəlxalq arenada mövqelərinin möhkəmlənməsi, mədəni, idman, humanitar tədbirlərə ev sahibliyi etməsi və digər məsələlər cəmiyyətin seçkilərə olan münasibətinə müsbət təsir göstərir.
- Azərbaycandakı seçkilərin region üçün əhəmiyyəti nədən ibarətdir?
- Azərbaycanda keçiriləcək seçkilərin region üçün əhəmiyyəti çox böyükdür. İqtisadi və siyasi cəhətdən güclü olan Azərbaycan, eyni zamanda, Xəzər regionunda inkişaf və sabitliyin qarantıdır. Hazırda Azərbaycan Xəzər dənizinin təbii sərvətlərinin öyrənilməsi və inkişafı ilə bağlı bir çox böyük layihələrə qoşulub, “Şimal-Cənub” nəqliyyat dəhlizi və Cənub Qaz Dəhlizi layihələri uğurla icra edilir. Azərbaycan, eyni zamanda, “Ekspo 2025”ə ev sahibliyi etmək üçün namizədliyini irəli sürüb. Azərbaycan elə bir ölkədir ki, burda insan resurslarına hər zaman böyük önəm verilir. Bu ölkədə yaşayan bütün dinlərin və xalqların nümayəndələrinə hörmət və bərabər yanaşma siyasəti həyat tərzidir. Azərbaycan da Rusiya kimi region iqtisadiyyatına həm sərmayə yatırır, həm də investisiya cəlb edir, bu isə yeni iş yerləri, sabitlik, sülh və rahat həyat deməkdir. Bu mənada əlbəttə, qarşıdakı prezident seçkilərinin nəticələrindən çox şey asılı olacaq.
- Hər yeni seçki ölkənin tarixində yeni mərhələnin başlanğıcı, inkişaf və islahatlarla xarakterizə olunur. Necə düşünürsünüz, budəfəki seçkilərin Azərbaycanın tarixində rolu nədən ibarətdir?
- Gələcəyi təxmin etmək çox çətindir. Amma düşünürəm ki, burada hər şey çox sadədir. Çünki, Azərbaycanda xalq üçün çox işlər görülüb. Ölkənizdə təbii sərvətlərin düşünülmüş şəkildə istifadəsi siyasəti davam etdirilir, insanların həyat şəraiti daim yaxşılaşdırılır. Bu siyasət gənc, müstəqil ölkəni sülhə və rifaha aparır. Müasir Azərbaycan dünya arenasında özünəlayiq yer tutub. Azərbaycan ən irimiqyaslı və cəsarətli layihələrin reallaşmasında da etibarlı və perspektivli tərəfdaşdır. Bu, əhalinin gəlirlərinin artması, sabitliyin möhkəmlənməsi ilə yanaşı, hər bir vətəndaşda atdığı addımın özü ilə yanaşı, ölkəsinə faydalı olduğuna dair təfəkkürün formalaşmasında da vacib rol oynayır.