İstefada olan general-mayor Elbrus Orucov gündəmi zəbt edən mövzularla bağlı Eurasia Diary-ə ekskluziv müsahibə verib. Müsahibəni oxucularımıza təqdim edirik:

- Azərbaycanın Hərbi Hava Qüvvələrinə məxsus MİQ-29 döyüş təyyarəsinin Xəzərə düşməsi ilə bağlı hərbi ekspertlər tərəfindən müxtəlif versiyalar səsləndirlir. Bunlardan biri də təyyarənin Rusiya tərəfindən vurulmasıdır. Bunları yəqin ki, mətbuatdan izləmisiz. Bir hərbçi kimi sizin də fikirlərinizi bilmək istərdik.

- Mən ixtisasca tankçıyam, hərbi təyyarə məsələsində mütəxəssis deyiləm. Lakin qeyd edə bilərəm ki,  istər MİQ-29 olsun, istər F-35, fərqi yoxdur, istənilən növ hərbi təyyarənin qəzaya uğraması ehtimalı var. Bu yaxınlarda İsraildə də bənzər bir hal baş vermişdi. Lakin belə halları şişirdib, spekulasiyalara çevirmək laszım deyil. Sizin də qeyd etdiyini kimi bəzi “ekspertlər” və ya özlərini ekspert adlandıran şəxslər bu hadisənin guya Rusiya hərbi qüvvələri tərəfindən törədildiyini bildirib. Guya rus hərbi gəmisi təlimdə olarkən təyyarəmizi vurub və s. Demək istəyirəm ki, bunların hər biri boş sözlərdir. Biz, professional hərbçilər və ekspertlər ancaq və ancaq məsələ komissiya tərəfindən araşdırdıqdan sonra öz fikrimizi deyə bilərik. Sizə bir söz deyim. Dünyada təyyarə qəzaları baş verəndə əvvəlcə təyyarəni istehsal edən zavoddan mütəxəssislər gəlib araşdırır. Bundan əlavə, “Qara qutu” tapılmalıdır və ondan sonra biz öz fikrimizi deyə bilərik. Bu gün nağıl danışmamalıyıq. Azərbaycanda bu gün özünü hərbi ekspert kimi ictimaiyyətə tanıdanları mən qəbul etmirəm və onlara hörmət də eləmirəm. Onlar nə mütəxəssis kimi mütəxəssis deyillər, nə də ekspert kimi danışığını bilmirlər.

- Siz Azərbaycanın Gürcüstandakı səfirliyində hərbi attaşe vəzifəsində çalışıbsız. Bilirsiniz ki, son vaxtlar Azərbaycan-Gürcüstan sərhədindəki “Keşikçidağ” məbədi ilə bağlı problemlər yaranıb. Son olaraq Gürcüstan vətəndaşları hətta sərhədçimizin silahını belə əlindən almağa çalışdılar. Siz bu insidenti necə dəyərləndirirsiz?

- Bəli, Namiq Əliyevin Gürcüstanda səfir işlədiyi müddətdə onunla birlikdə 5 il bu regionda olmuşam və birgə çalışmışıq. O zamandan bu yana “Keşikçidağ” məsələsi ara-sıra dilə gətirilib. Lakin heç vaxt bu məsələ dövlətlər arasında ciddi bir problemə çevrilməyib. Gürcüstan Azərbaycan sərhədində, “Keşikçidağ”a yaxın ərazidə yaşayan əhalinin əksəriyyəti ingiloylardır. İngiloylar qarışıq xalqlardandır və dini cəhətdən xristiandırlar. Bu gün erməni lobbisi bu xalqları azərbaycanlılara qarşı qaldırmağa səy göstərir. Bu məsələdə 100 faiz erməni əli var. Namiq Əliyevin vaxtında biz 2-3 dəfə bu problemin qarşısını almağa müvəffəq olduq. Orada diqqətli olmaq lazımdır. Bu, elə-belə məsələlər deyil. Harda bizim zəifliyimiz var, o zəiflikdən düşmənlərimiz istifadə edəcək. Əgər delimitasiya məsələsi həll olunmayıbsa, bu, zəiflikdir. Azərbaycanın bu zəifliyindən düşmən mütləq istifadə etməlidir. Təcili komissiya bu məsələ üzərində işləməli və delimitasiya məsələsi həll olunmalıdır. Əgər indi alınmasa, bunun ağır nəticələri ola bilər, qan tökülə bilər. Biz son insidentdə gördük ki, onlar hansı hərəkətləri etdilər. Sərhəd Qoşunlarımızın əsgərlərini təxribata çəkmək istədilər, sərhədçimizin silahına əl atdılar. Əsgərin silahını əldən almaq cinayətdir. Və cinayəti törədənlər həmin silahdan istifadə eləsələr, qan tökülə bilər. Bu da Azərbaycanla Gürcüstan arasında böyük problemlərə gətirib çıxarar. Onlar ingiloyları ortalığa atıblar, Qafqaz Albaniyasına məxsus məbədlərlə bağlı işlər aparırlar. Ona görə də təcili delimitasiya məsələsini həll etmək lazımdır. Nə qədər geciksək, düşmən bundan istifadə edəcək.

- Azərbaycan-Ermənistan sərhəddində iyulun 18-dən bu yana demək olar ki, hər gün atəşkəs pozulur. Əvvəllər atəşkəs daha çox Qarabağ istiqamətindən pozulardı, indi isə Qazax-Tovuz istiqamətindən. Nə üçün ermənilər Azərbaycanla sərhəddə təxribatlarını artırıblar?

- Gəlin nəzərə alaq ki, Paşinyan hakimiyyətə gələndən sonra birinci çıxışında dedi ki, Qarabağ məsələsini Azərbaycan Qarabağdakı ermənilərlə danışmalıdır, Ermənistan bu məsələdə zəmanətçi kimi çıxış edə bilər. O, bununla mesaj göndərdi ki, mən bü gün Ermənistanla Azərbaycan arasında olan münasibəti sizinlə danışmayacam, birinci gedin Qarabağla danışın. İkincisi, aprel döyüşlərindən sonra Paşinyan demişdi ki, bu məsələdə Kollektiv Təhlükəsizlik Müqaviləsi Təşkilatının (KTMT) mövqeyini bəyənmədik. Onlar da demişdi ki, KTMT-nin nizamnaməsində yazılıb ki, əgər KTMT üzvlərindən birinə qarşı hər hansısa dövlət hücuma keçərsə, ərazisinə daxil olarsa, digər dövlətlər dərhal bu hadisəyə reaksiya verməli və müttəfiqlərini müdafiə etməlidir. İndi Paşinyanın birinci çıxışını nəzərə alsaq, ermənilər Qarabağdan deyil, Azərbaycanla sərhəddən təxribatlar həyata keçirməyə başlayıb və istəyir ki, Azərbaycan bu təxribatlara eynən aprel hadisələrində olduğu kimi cavab versin. Sərhəd Qoşunları Silahlı Qüvvələrin bir hissəsidir və Azərbaycan sərhədçiləri bu təxribatlara qeyd etdiyim kimi cavab verərsə, Ermənistan məsələni dərhal KTMT-də qaldıracaq və Rusiya başda olmaqla bütün KTMT üzvləri məsələyə qarışmalı olacaq. Paşinyanın məqsədi odur ki, KTMT-ni məsələyə qarışdırsın...

Nicat İSMAYILOV