Xəbər verdiyimiz kimi, 15 oktyabrın tarixində Azərbaycan Respublikasının Prezidenti İlham Əliyevin yanında iqtisadi müşavirə keçirilib. İlham Əliyev müşavirədə islahatlar prosesi və ona əngəl olan amillər haqında ətraflı açıqlamalar verib.

Mövzu ilə bağlı, Milli Məclisinin deputatı Tahir Rzayev öz fikirlərini Eurasia Diary ilə bölüşüb.

“Azərbaycan demokratik ölkədir. Demokratik təəsüratlar imkan verir ki, insanlar azad fikirlərini bildirsinlər. Hər demokratik ölkədə olduğu kimi Azərbaycanda da mətbuat azadlığı var. Ancaq çox təəsüflər olsun ki, mətbuat orqanları, informasiya vasitləri bu demoktratik imtiyazlardan sui-istifadə edirlər. İnsanları şantaj edirlər, insanlar haqqında böhtan xarakterli məlumatlar yayırlar. Bəzən insanların hətta şəxsi həyatına toxunurlar. Nəyin ki, insanın şəxsi həyatı, onun ailəsi haqqında, qohum əqrabası haqqında xoşa gəlməz ifadələr işlədirlər. Dövlət başçısı dəfələrlə ölkədə yaşayan bütün vətəndaşların hər birinin prezidenti olduğunu qeyd edib və təbii ki, bu son hadisələrdə onu narahat etməyə bilməzdi.  Məhz bu gün islahatlara kölgə salanlar, onlara maneə yaratmaq istəyənlər, ağıllı, gənc kadrları bəyənmiyənlər, onları şantaj edənlər var. Bu həqiqət göz önündədir”.

Deputat prezidentin fəaliyyətindən məmnun olduğu nazirliklərdəki son dövrdə baş verən müsbət dəyişiklərə toxunub:

“Cənab Prezident müşavirədə Sosial Müdafiə Nazirliyi və Vergilər Nazirliyi nümunə göstərdi. Həqiqətəndə bu sahədə ciddi islahatlar keçirilib. Məsələn Gömrük Komitəsi və Vergi Komitəsi ayın yekunlarına görə 700 milyondan çox və əlavə vəsait büdcəyə gətiriblər.  Bunlar böyük rəqəmlərdir və əlbəttə ki, bu rəqəmlərin büdcəyə gətirilməsi insanların rifah halının yaxşılaşmasına öz müsbət təsirini göstərir . Əvvəllər belə bir fikir formalaşmışdı ki, sözügedən sahələrdə ciddi dəyişiklik yaratmaq çox çətin olar. Lakin bu sahələrdə kadr dəyişikliyi ciddi uğurların əldə edilməsinə səbəb oldu. Həmçinin Əmək və Əhalinin Sosial Müdafiəsi Nazirliyi də son dövrlər öz müsbət fəaliyyəti ilə seçilən qurumlarımızdan biridir.

“Bəzi məmurlar öz həmkarlarının uğurlarını qısqanır. Bu qısqanclıq sonradan qaralama kampaniyalarına səbəb olur. Bu bağışlanılmazdır. Digər tərəfdən Cənab Prezident korrupsiyaya qarşı mübarizənin genişləndiriləcəyini bildirib ki, bu doğurdan da ölkənin imicinə ciddi zərər vuran məsələlərdir. Ölkə rəhbəri qeyri-neft sənayəsində 17%, kənd təsərüfatlarında isə 7% artım olduğu bildirdi. Eyni zamanda sosial sahədə vətəndaş rifahı naminə çox ciddi proqramlar həyata keçirilir”.

Millət vəkili keçirilən müşavirədə Prezidentin mesajlarının konkret hansı məmurlara yönəldiyini üstüörtülü şəkildə izah edib.

“Bu bir çox şəxslərə, o cümlədən, sıravi vətəndaşlara da yönələn mesaj idi. Çünki biz ölkə vətəndaşıyıqsa, hər birimiz ölkədəki islahatların həyata keçirilməsində iştirak etməliyik. Sadə vətəndaşlardan tutmuş, yüksək çinli məmurlara qədər ölkədəki hər kəs islahatlara dəstək olmalıdır. Sözsüz ki, ölkə rəhbəri təkcə hansısa məmurları nəzərdə tutmur. Məsələn orta təbəqədən olan bir sahibkar vergidən yayınırsa o da bu islahatlara müəyyən səviyyədə mane olur. Eyni zamanda hansı nazirlikdən vətəndaşlar yaxşı qəbul olunmursa,  o nazirlikdən ərizə şikayətləri çoxdursa deməli bu qurum prezidentin sonuncu xəbərdarlıq mesajlarının ünvanıdır. Bu şəxslərin konkret adlarını deməyə ehtiyac yoxdur, onlar artıq məlumdur”.