Eurasia Diary beynəlxalq münasibətlər üzrə ekspert, tarix elmləri namizədi, analitik mərkəzin direktoru Esen Usubalievlə eksklüziv reportajı təqdim edir.

Tarixçi ekspert ermənilər və azərbaycanlılar arasında konfliktin nədən qaynaqlandığı barədə danışarkən bunları deyib:

“Sovet İttifaqı daxilində yaşayan xalqlar çoxmillətli ailələrdə yaşayırdılar. Hamı tərəfindən belə qəbul edilmişdi ki, burada baş verən istənilən konflikt Moskva vasitəsilə həll olunur. İttifaqın dağılması ərəfəsində millətçi ermənilər yeni ərazilər qoparmaq üçün məsələnin köklü həll olunmasını istədilər. Əslində, istər Sovet İttifaqı tərkibində, istərsə də xaricdə yaşayan ermənilər “Böyük Ermənistan”ın formalaşması üçün fürsət gözləyirdilər".

İkinci Qarabağ müharibəsi fonunda qızğın informasiya müharibəsinin getdiyini deyən ekspert ermənilərin çox sayda feyk xəbərlər yaydığını bildirib: “Onlar özlərini müqəddəratı təyin edilməmiş bir xalq olaraq və Azərbaycanı da təcavüzkar bir dövlət kimi göstərirdilər. Yalan məlumatlar yayımlamaq üçün beynəlxalq media korporasiyalarındakı geniş imkanlarından bolluca istifadə edirdilər. Lakin Azərbaycan tərəfi onların saxtakarlığına qarşı faktlar və dəlillər qoyurdu.

O, müharibə dövründə Türkiyə və Ukraynanın Azərbaycanı dəstəkləyən dövlətlərin arasında olmasının əsas səbəbini ikincinin, Krım problemindən irəli gələn ərazi bütövlüyü prinsipinə dair baxışı və Türkiyənin Azərbaycana qardaş ölkə olması ilə izah edib: “Türkiyənin Cənubi Qafqazda, Yaxın Şərqdə, Orta Şərqdə və Qara dənizdə böyük nüfuza malik olması, eləcə də Suriya münaqişəsində Rusiya ilə maraqlarını uzlaşdıra bilməsi Qarabağ münaqişəsinin həllində vacib rol oynadı".

30 il ərzində Azərbaycanın ordu quruculuğu istiqamətində böyük işlər gördüyünü deyən ekspert Türkiyənin iştirakının münaqişədə ümumi maraqların təmin edilməsi baxımdan əhəmiyyətli olduğunu vurğulayıb.

Daha ətraflı videoda:

Müsahibəni aldı: Cəmilə Çebotareva

Tərcümə etdi Gülnar Səlimova