Eurasia Diary aparıcı həkim oftalmoloq Elmira Yusubova ilə müsahibəni təqdim edir.
E.Yusubova bildirib ki, insanların həyat tərzi dəyişdiyindən real həyatdan çox, rəqəmsal dünyada yaşayırıq. Onun sözlərinə görə, biz hər tərəfdə texnika ilə əhatə olunmuşuq. Bu səbəbdən gözlərimiz əsasən yaxın məsafədə işləyir.
"Gözün optik sistemi isə elə qurulub ki, 1 metrlik məsafədə çalışması göz əzələləri üçün hiper yüklənməyə səbəb olur. Buna görə, hazırda çox insanda yaxındangörmə problemi var. Ailələrdə analar öz rahatlığı üçün azyaşlı uşaqların əlinə telefon verir. Ümumiyyətlə, 6 yaşadək olan uşaqlara telefondan istifadə etməyə icazə verilməməlidir. Əvəzində uşaqlar rəsm, plastilin və digər məşğuliyyətlərə yönəldilməlidir. Görmə qabiliyyətində problemi olan uşaqlar həkim tövsiyyəsi əsasında mütləq eynək taxmalıdır. Bunun üçün onları anaları psixoloji olaraq hazırlamalıdır. Əks təqdirdə, gələcəkdə gözlər tənbəlləşir və 19-20 yaşlarında olan pasiyentə lazer korreksiyası artıq kömək etmir", o qeyd edib.
Həkim ekspert, göz üçün gimnastikanın dəstəkləyici komponent kimi rolu olduğunu deyib. O bildirib ki, ciddi xəstəlikdə bu xilas etməsə də yardımçı olur. Kompüter şüalarının mənfi təsirini azaltmaq üçün kaktus və digər bitkilərin istifadəsi barədə isə bildirib ki, şüanın ziyanverici təsirinin qarşısını ancaq qoruyucu eynək taxmaqla almaq olar. Həkim, onlayn formatda keçən dərslərdə uşaqlara 40 dəqiqəlik dərsdən sonra 10 dəqiqə kompüterdən aralanıb uzaq məsafəyə baxmaqla dincəlməyi məsləhət görüb. O, kitablarla kompüteri müqayisə edərkən kitabların xüsusi atmosfer yaratdığı üçün daha üstün olduğunu deyib. Həmçinin, kitablar analitik düşüncə üçün imkan yaradır. Telefonda bir toxunuşla əldə edilən informasiyalar çoxluğuna rəğmən məqsədyönlü deyillər və analitik düşüncə üçün imkan yaratmır.
E.Yusubova bildirib ki, əgər insanın görmə qabiliyyətində hər hansı patologiya yoxdusa ildə bir dəfə, problem varsa yarım ildən bir, yaşlı adamlar isə 3-6 aydan bir həkim müayinəsindən keçməlidirlər. Gözlər bədənin çox həssas hissəsidir. Gözlərinizə qulluq etməsəniz, yorğunluğuna məhəl qoymasanız, onda tezliklə aydın görmə qabiliyyətini itirəcəklər. Görmə orqanınızla düzgün rəftar edib etmədiyiniz, onlara istirahət verib vermədiyiniz barədə düşünməyə dəyər.
Daha ətraflı videoda:
Müsahibəni aldı: Cəmilə Çebotareva
Tərcümə: Gülnar Səlimova
