Müsahibimiz İkinci Qarabağ müharibəsinin iştirakçısı xüsusi təyinatlı gizir Baxışov Məhəmmədəli Rəşad oğludur.
"Məktəbdə 8-9-cu sinifdə oxuyan zaman birinci Qarabağ müharibəsi ilə bağlı gördüyüm kadrlardan sonra hərbçi olmaq qərarına gəldim, qismən də olsa günahsız yerə qətlə yetirilən həmvətənlərimizin qisasını almağa çalışmalıydım.
Füzuli, Xocavənddə, Hadrut və Tuğ qəsəbələrində, Şuşa uğrunda döyüşlərdə iştirak etmişəm. Xüsusi təyinatlılar təkcə yollarla deyil, dağlar, meşələr və cığırlarla hərəkət edib.
Bölük komandirim Hüseynli Əmrah Xocavəndin Tuğ qəsəbəsində 34 nəfəri pusqudan çıxarmışdı, o, Şuşa ətrafında döyüşlərdə şəhid oldu.
Şuşa şəhərində çətin pusqudan çıxmışıq. Həm şəxsi heyət, iki tank və bir BTR üzərimizə gəlirdi. Şuşada irəlilədik, şəhər ətrafındakı yüksəkliyə çatmışdıq. Bu an həyəcan siqnalı verildi. Onların Şuşadan çıxmağı tam başqa sevinc və qürur hissi idi.
Biz bir evdən iki qardaş döyüşlərə qatılmışıq, ikimizdə də qaziyik. 23 gün nə mən, nə də o evlə əl saxlaya bilmədik.
5-dən 6-na keçən gecə saat 2-də şəhərə girəndə Laçına və Xankəndinə dönən döngədə üzbəüz döyüşlər gedirdi. Orada yaralandım. İynə dərmanımız qurtarmışdı. Təxliyədən sonra 4 gün getmədim, döyüşdüm. Artıq 9-da məni çıxaranda Hadrutda səyyar məntəqədə ayıltdılar. Allah və həkimlərimizin sayəsində həyata qayıtdım.
Yaralanandan sonra əməliyyat olundum. Hazırda sol ayağım dib hissədən sınıqdır, gözümdəki qəlpə çıxarılıb, başımda 250-dən çox qəlpə var.
Cənab Prezident tərəfindən Füzuli, Xocavənd, Şuşa uğrunda döyüşlərə görə, “İgidliyə görə” və “Şücaətə görə” medalları ilə təltif olunmuşam".
EDNews.net 8 Noyabr Zəfər Günü ilə əlaqədar hazırladığı növbəti müsahibəni təqdim edir: