“Azərbaycan mədəniyyəti və yeməkləri üçün çox darıxıram. Yeməklərin oxşar olduğu qonşu ölkə olan Türkiyədə olsam belə, Azərbaycan yeməkləri daha fərqlidir. Onların xüsusi dadı var”.

 

ABŞ-nin Azərbaycandakı keçmiş səfiri, ATƏT-in Minsk qrupunun sabiq həmsədri Metyu Brayza Ednews-a özəl müsahibə verib.

 

Müsahibə zamanı ABŞ-li diplomat Azərbaycan haqqında maraqlı məqamlara da toxunub. O, işğal zamanı Şuşaya etdiyi səfərlərdən və yenidən o şəhəri görmək həyacanından da söz açıb. Söhbət zamanı cənab Brayza Azərbaycan mətbəxi üçün çox darıxdığını da deyib:

 

-Azərbaycan mətbəxi çox özəldir. Baharatlar, ədviyyatların istifadəsi, pomidor, xiyar, bibər kimi məhsullar fərqlidir. Onlar burada inanılmaz dərəcə təravətli və dadlı olur. Ancaq təbii ki, Azərbaycanın insanları, burada ailəmə qarşı isti və gözəl münasibət bəsləyən dəyərli dostlar üçün isə daha çox darıxıram.

 

 

- Bakıya “Bakı Enerji Həftəsi” üçün səfər etmisiniz. Başqa hansı planlarınız var? 

 

- Bəli, Azərbaycana sırf "Bakı Enerji Həftəsi" üçün gəlmişəm. Hökumət rəsmiləri, nazir, baş nazir müavini, beynəlxalq enerji şirkəti nümayəndələri, “SOCAR” kimi böyük şəxslərlə mükəmməl söhbət və prezentasiyalar edirik. Bu səfər mənim üçün çox produktivdir. Forumda iştirak etməkdən əlavə olaraq beynəlxalq və Azərbaycan enerji şirkətlərinin nümayəndələri ilə son dərəcə faydalı görüşlər keçirirəm. 

 

 

- Daha hansı görüşləri nəzərdə tutursunuz? Ümumiyyətlə, bu görüşlərin məqsədi nə olacaq?

 

Azərbaycan hökumət rəsmiləri, “SOCAR” kimi enerji şirkətlərinin nümayəndələri ilə görüşlərim olub. Şirkət nümayəndələri və BP-nin region üzrə prezidenti Geri Cons ilə şənbə günü Şuşaya səfərimiz olacaq. Səfərimiz Qarabağı bərpa olunan enerji ilə tamamilə yaşıllaşdırılmış bir regiona çevirmək üçün BP-nin Azərbaycan hökuməti ilə birgə planlaşdırdığı investisiya ilə bağlı məlumat almaq məqsədi daşıyacaq. 

 

 

-Bildiyimiz qədər Şuşaya da səfər edəcəksiniz. Sizcə, bu səfəriniz digərlərindən nə ilə fərqlənəcək? Şuşada nəyi görmək istəyərdiniz?

 

 - ATƏT-in Minsk qrupunun həmsədri olduğum müddətdə Şuşaya çox səfərlərim olub. Qarabağa səfərlərim zamanı hər zaman Şuşada da olmuşam. Şuşa çox xüsusi bir yerdir. Şuşa azad olunandan sonra, Azərbaycanın mədəniyyət paytaxtının dəyişimi, xüsusilə də yaşıl şəhər olması üçün etdiyi investisiyalar nəticəsində necə dəyişdiyini görməyi çox istəyirəm.

 

- Suallarımızı cavablandırdığınız üçün sizə təşəkkür edirik.

 

- Çox xoş oldu!

 

Mirvari Əzizova

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary