Son zamanlar trendə çevrilən, eyni zamanda böyük müzakirələrə səbəb olan “Dünya sənin, dünya mənim” mahnısının gənc ifaçısı deyir ki, insanlar bizim bu təşəbbüsü çox gözəl qarşıladı və bu ürəyimizi isindirdi.

 

Sözləri böyük şairimiz Məmməd Araza məxsus və 1987-ci ildə tamaşaçılarına bu əsəri ifası ilə ərmağan edən Xalq artisti Niyaməddin Musayevdən sonra “Dərvish band” qrupu ona yeni nəfəs verdi.

 

Əsərin ana xəttini dəyişmədən, eyni zamanda ona müasir çalarlar qatan qrupun solisti Fərid Məmmədovun bu ifası demək olar ki, bir çoxları tərəfindən bəyənildi, lakin onu tənqid edənlər də oldu.

Bəs, görəsən gənc solist özü bu haqda nə düşünür?

 

Ednews-a danışan Fərid ilk olaraq bildirdi ki, yeni ifaları insanlar tərəfindən çox gözəl qarşılanması çox sevindirici haldır. Bu cür qısa zamanda millətimiz tərəfindən bu qədər sevilmək olduqca xoşdur. 

Müsahibimizlə baş tutan maraqlı söhbətimizi təqdim edirik:

 

- Niyə məhz “Dünya sənin, dünya mənim” mahnısını seçdiniz?

 

- Ümumiyyətlə Niyaməddin Musayevin repertuarına və şəxsiyyətinə çox böyük hörmət və sevgimiz var. Bu mahnını isə hər zamanki kimi bizim dövrdə də aktualdır və marağ doğurur. Elə bu səbəbə görə də seçimimizi bu mahnının üzərində saxladıq. 

- Bildiyiniz kimi mahnının sözləri böyük şairimiz Məmməd Araza məxsusdur. Mahnını yeni aranjimanda təqdim edəndə insanlar tərəfindən sevilməyəcəyi barədə bir qorxnuz oldumu? 

 

- Bu mahnı 40 ilə yaxındır ki, Məmməd Araz və Niyaməddin müəllimin təşkil etdiyi bir tandem sayəsində möhtəşəm bir əsərə çevrilib. Bu səbəbdən də mahnının necə qarşılacağına dair heç bir neqativ fikrimiz, qorxumuz yox idi. Azərbaycan, türk dillərində rok musiqisi millətimiz tərəfindən sevilir və buna tələbat da var. Məhz bu da bizim yaradıcılığımıza bir təkan oldu.

 

- Maraqlıdır, mahnını ilk dəfə dinləyəndə hansı hissləri keçirmisiniz? 

 

- Mahnını ilk dəfə uşaqkən eşitmişdim. Yadımda qalan odur ki, yeni səslənmə, ifa tərzi məni çox təsirləndirmişdi. Mənim üçün bu əsər hər zaman ayrıca bir yerdə olacağına şübhə etmirəm. Hər zaman dərin məna daşıyan mahnılardan həyat dərsi almağa çalışmışam və bu məni olduğum yerə gətirib formalaşdırıb. Mahnıda ən çox sevdiyim hissəsi “Əbədiyə qəh- qəh çəkər ədəbi dünya” sözlərindən ibarətdir. Düşünsək, bu sözlərin çox dərin mənası var.

 - Niyammədin Musayevin bu çıxışınıza münasibəti necə oldu?

 

- Hər şeydən öncə Niyamməddin bəyə təşəkkür edirik bizə bu mövzuda dəstək oldu. Niyaməddin müəllim bu ifamızı çox bəyəndi. O, bir daha əfsanəvi şəxsiyyət olduğunu sübut etdi. Ona çox böyük minnətdarlığımızı bildirmək istəyirik!

- Gələcəkdə başqa hansı nostalji mahnılarımıza yeni tərz qatmağı düşünürsünüz?

 

- Hər şey ola bilər. Planlarımız çoxdu. Bizim heyət yaradıcı insanlardan ibarətdir. Özümüzün müəllifi olduğumuz mahnılarımız da var. İnşallah tezliklə dinləyicilərimiz çoxlu sürprizlər və yeni mahnılar görəcək.

 

Kazımlı Rübabə

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary