- Sənan bəy, müsahibədən öncə qeyd etdiniz ki, at sürürəm. Şeyx Sənan serialının çəkilişləri ilə bağlıdır?

- At sürürdüm. Şeyx Sənan serialı ilə bağlı deyil. Tarixi bir filmin çəkilişlərinə hazırlaşırıq. Məhz  bu tarixi filmin məşqlərindəyəm.

- "Şeyx Sənan" sizin yaradıcılığınızın hansı mərhələsidir?

- "Şeyx Sənan" mənin yaradıcılığımın ilk mərhələsi olmasa da bu layihəyə kimi 30-a yaxın film və seriallarda  iştirak etmişəm. Dövlət və özəl filmlərdə seriallarda uzun müddətli seriallara çəkilmişəm. Yaradıcılığımın ilk mərhələsi olmasa da xüsusi mərhələsidir. Çünki burada Hüseyn Cavidin ruhu var. Cavid əfəndinin -"Şeyx Sənan" pyesinin motivləri əsasında yaranan 12 bölümlük film var. Eyni zamanda məni Şeyx Sənanla mənəvi bir bağım var. Çünki mənim adım da Sənandır. Atam adımı Şeyx Sənanın adından götürüb. Özüm də Tiflisdə doğulmuşam. Doğulduğum yerlə üzbəüz Şeyx Sənan dağı var. Əfsanələrə görə Şeyx Sənan həmin dağda dəfn olunub. Buna görə də "Şeyx Sənan"ın  mənim yaradıcılığımda xüsusi bir yeri var. İştirak etdiyim bütün layihələrim mənim üçün doğmadır. Amma Şeyx Sənan adım qədər yaxındır. 12 bölümlük serialın ərsəyə gəlməsində müəllifi və quruluşçu rejissoru Xəyyam Abdullazadə, Elçin Elxanlının və digər aktyorların çox böyük rolu var.

- Şeyx Sənanın axtarışına çıxdığı həqiqətlər onu hara aparacaq?

- Şeyx Sənan eşq axtarışındadır. Bu eşq bizim gördüyümüz maddi yox, mənəvi eşqdir. İlahi eşq isə Şeyx Sənanın gözündə Tamara cismində təcəssüm edir. O Tamaradakı dürüstlüyü  saflığı həm də ilahi eşqlə bərabərləşdirir. Ona görə də yekunda Sənan hər şeydən imtina edərək yenidən doğuş prossesinə başlayır. Yenidən doğuş mərhələsində isə Sənan xristianlığın qəbul edir, xaç suyuna girir, boynundan xaç asır. Amma bütün bunlar sadəcə görünən tərəflərdir. Mənə görə isə Şeyx Sənan Qurandan, dindən imtina etmədi, əksinə dini tapdı. Özündən imtina edib dini tapdı. O, əslində xaç suyuna girmədi yenidən doğuldu. Boynundan xaç asmadı çarmıxa çəkildi. Bütün bunların fonunda isə Sənan müasir cəmiyyətə ilahi eşqlə bərabər doğruluq və dürüstlüyü gətirmək üçün təlatüm yaşamaqdadır. 

- Həyatda Şeyx Sənan olsaydınız Azərbaycan cəmiyyətində nələri dəyişərdiniz?

- Biz bunu serialın ssenari müəllifi və quruluşçu rejissoru Xəyyam Abdullazadə və Elçin Elxanlı ilə hazırlıq müddətində söhbət etmişik. Müasir Şeyx Sənanı çəkirik. Müasir cəmiyyətimizdən Şeyx Sənan olsaydı nələri dəyişməyə çalışardı? Bu uzun illərdir ki, Xəyyamın beynində olan ideası idi. Onu müasir formada layihələşdirdi. Şeyx Sənanlıq şəxsiyyət, obraz deyil, yaşam tərzidir. Şeyx Sənan bir həyat tərzinə çevrilib. Şeyx Sənan döyülür, söyülür, əzab-əziyyət çəkir, təhqirlərə məruz qalır, şərə uğrayır. Amma bütün bunların fonunda yalan danışmır, sözündə bütövdür, xəyanət etmir. Öz ideyası uğrunda mübarizə aparır. Ölümə aparan yol olsa belə bu yoldan imtina etmir. Həqiqətən də Şeyx Sənan olsaydım  mən sizə dediklərimin hər birini dəyişməyə çalışardım. Çalışardım insanlar bir birinə xəyanət etməsinlər,sözünə bütöv olsunlar. Öz məqsədlərinə doğru irəliləsinlər.

- Sizcə, Şeyx Sənan müasir cəmiyyətimiz üçün kimdir və ya nəyi ifadə edir? 

- Şeyx Sənan müasir cəmiyyətimiz üçün yüz il bundan əvvəl yazılmış müasir bir obrazdır. Müasir cəmiyyətimniz üçün xristian bir qız üçün dinini dəyişmiş müsəlman şeyxidir. Şeyx Sənan neçə insanın edə bilməyəcəyi mən necə dinimi dəyişə bilərəm,ilahi eşq üçün bütün bunları necə edərəm deyilən bir obraz olsa da böyük bir cəsarət nümayiş etdirib. Mən əminəm ki, bu cəmiyyətdə belə insanlar var. Ola bilsin ki, onlar çox tanınmırlar, amma 12 bölümlük serialıma baxanda müasir Azərbaycan tamaşaçısı Şeyx Sənanın müasir cəmiyyətimiz üçün nə ifadə etdiyini tapacaqlar. Şeyx Sənanda özlərini görə biləcəklər. İddialı səslənməsin, amma mən bu obrazı canlandıranda çalışdım ki, Şeyx Sənanı bir insanın yox 12 insanın timsalını göstərim. 

- Əsər müsəlman və xristian məhəbbətindən bəhs edir. Sizcə sevginin dini olurmu?

- Biz çox xoşbəxt cəmiyyət və dövlətik ki, bizdə sevginin dini yoxdur. Mən həqiqətən fəxr edirəm ki, Azərbaycan tolerant bir ölkədir. Aprel ayı yaxınlaşır. Bu ayda həm müsəlmanların müqəddəs bayramı Ramazan, həm də xristianların Pasxa bayramıdır. Azərbaycanda yetəri qədər müsəlmanlar və xristianlar var. Həm müsəlmanların həm də xristianların xoşbəxt yaşadığı dövlətdə sizcə sevginin dini ola bilərmi? 

Şeyx Sənanın çəkdiyimiz yerlər Azərbaycanımızda çəkilib. Udi Alban kilsəsində mən Xaç suyuna girmişəm. Udi xristian icması bizi çox səmimi şəkildə qarşıladı. Qaxda həmçinin məsciddə də çəkilişlərimiz oldu. Qax məscidinin axundu da bizi eyni səmimiyyətlə qarşıladı. Sevgi olduğu yerdə dinin fərqi yoxdur.

Söhbətləşdi: Ayan Rzayeva