İranın xarici işlər naziri Zəngəzur dəhlizi haqqında bildirib ki, regionda İranı Ermənistanla birləşdirən tarixi marşrutun məhdudlaşdırılmasına və ya bağlanmasına imkan verməyəcəklər. 
İran yenə ikibaşlı oynamağa başlayıb. Gah Azərbaycanla prosesləri normallaşdırmağa cəhd edir, gah da yenidən təxribatçı acıqlamalar verir.

Ağ Partiyanın sədri Tural Abbaslı Ednews – a açıqlamasında, İranın ikili standartlarının səbəbi olaraq koalisiyaya məruz qalmasını göstərib:

“İran hazırda Rusiya, İran, Azərbaycan, Pakistan, ABŞ və yaxud İsrail ilə qarşı – qarşıya gəlmək istəmir. Bilir ki, İranla heç bir dövlət tək başına vuruşmayacaq və koalisiyaya məruz qalacaq. Özünün də daxilində kifayət qədər narazılıqlar var. Ona görə o başa düşür li, mümkün bir müharibə rejimin sonunu gətirə bilər. Eyni zamanda İran qeyd edib ki, Ermənistanın varlığı onlar üçün qırmızı xətdir. Onlar çox gözəl bilir ki, Azərbaycan Zəngəzuru geri qaytarsa və Ermənistanla sərhəd bu şəkildə bağlansa, İranın manevr imkanı məhdudlaşmış olur. Bu baxımdan da bu qırmızı xətdir və onlar sonuna kimi mübarizə aparırlar. Lakin düşünürəm ki, Azərbaycan və onun müttəfiqləri də bir o qədər İran qədər inadkar olmalıdır. Dünənə kimi SSRİ ilə sərhəd olan ölkə indi gəlib tarixdən dəm vurur. SSRİ – dən əvvəl də bütün o ərazilər AXC- nin tərkibində idi. İran regionda sona qədər öz maraqlarını qorumağa çalışır. Ələxsus burada idealoji maraqlar da var. Sözsüz Türkiyənin sünni bir dövlət olduğunu nəzərə alsaq, onun öz maraq dairəsi altında olan bir regionda fəaliyyət göstərməsini istəməz. Sözsüz bilməliyik ki, Zəngəzur dəhlizinin hazırda ən böyük əleyhdarları İrandır və biz bu istiqamətdə fəaliyyət göstərməliyik”.

Milli Məclis deputatı Fazil Mustafa da məsələ ilə bağlı fikirlərini Ednews – la paylaşıb. O, qeyd edib ki, İranın bu cür açıqlamaları əslində gözləniləndir. 

“Çünki bu dövlətin siması və prinsipsizliyi bəllidir. Bu açıqlama isə çox səviyyəsiz bir açıqlamadır. İran regionda hansısa dövlətə yol açmaq istəyirsə, ona müdaxilə edə bilməz. Heç kim heç nəyi məhdudlaşdırmır. Burada sadəcə bəhanələri irəli sürməyin mənası yoxdur. Azərbaycan İranın öz istəyindən qeyri-aslı bir şəkildə öz hədəfinə nail olmalıdır və olacaq da. Biz ayrıca İran ərazisindən bir yol istəmirik. Bu Ermənistanla Azərbaycan arasında öz həllini tapacaqdır və İranın bura heç bir aidiyyatı yoxdur. Ona görə səsləndirilmiş bu fikirlər çox absurddur. Biz İranın qeyri – səmimi mövqeyini hər zaman vurğulayırıq. İran sanki regionda Fransadan sonra üçüncü bir erməni dövlətidir. Ələxsus İranın Fransa ilə birlikdə atdığı addımları da Azərbaycan maraqlarına uyğun gözləmək sadəlövhlükdür. Biz öz kursumuzu davam etditməli və bu yolu açmalıyıq”.

Əkbər Novruz