Rəsmi Bakı yaxın vaxtlarda BMT-nin beynəlxalq ekspertlər qrupunun Qarabağa səfərinə icazə vermək niyyətindədir. Bu barədə mətbuatda məlumatlar yayılıb.

Bəs bu qrupun burada iştirakı hansı məqsədləri hədəfləyir? 

Məsələ ilə bağlı politoloq Niyaməddin Orduxanlı Ednews - a müsahibəsində bildirib ki, Azərbaycan bütün beynəlxalq təşkilatlarla əməkdaşlıq niyyətini hər zaman ortaya qoyub:

“Əslində Azərbaycan uzun illərdir başda BMT olmaqla, bütün beynəlxalq təşkilatlarda, Azərbaycanın ərazi bütövlüyünün tam bərpa olması, suverenliyin əldə edilməsi və sülh şəraitində yaşanılmasını ortaya qoyub. Çünki Azərbaycanın əraziləri 30 il işğal altında olub. Azərbaycan dəfələrlə bütün beynəlxalq təşkilatlarla, aparıcı olan və ya olmayan dövlətlərlə əməkdaşlıq etmək niyyətini ortaya qoyub. Çox təəssüf ki, BMT Təhlükəsizlik Şurasının bəlli 4 qətnaməsi olduğu halda belə, Azərbaycana ikili standartlarla yanaşılıb. Beynəlxalq hüququn təmin olunmasına çox laqeyd münasibət göstərilib. Ən dəhşətlisi də Azərbaycana qarşı “Azadlığa Dəstək Aktı”na 907 – ci düzəlişi tətbiq edib, ölkəmizi o yardımdan məhrum etmişdilər”. 

Politoloq müsahibə əsnasında BMT – nin regiondakı hadisələrə ikili standart nümayiş etdirməsinə də toxunub.

“Bu gün BMT və digər aparıcı beynəlxalq təşkilatlar Ukraynada baş verən hadisələrə görə işğalçı adlandırır və sanksiya tətbiq olunur. Lakin necə ola bilər ki, Azərbaycanın 1991 – 1992 – ci ildə BMT – də qəbul etdirdiyi əraziləri Ermənistan işğal edəndə onlar sakit qaldılar. Bir işğalçıya münasibət bəsləyib, digərinə münasibət göstərməmək, qeyri – mütənasiblik təşkil edir. BMT – nin vəzifəsi yarandığı tarixdən beynəlxalq hüququn tam təmini üzərinə olub. Lakin alınan qərarlar sadəcə göz aldatmaq məqsədilə, yazılı formatda olub”.

Sonda o, bu qrupun Qarabağa gəlməsini yüksək qiymətləndirib və bildirib ki, bu onlara bütün gerçəkləri göstərəcəkdir:

“Ələxsus BMT artıq başa düşür ki, həmin o, TŞ – nin 4 qətnamələrini Azərbaycan tək başına icra etdi. Azərbaycan öz gücünü nümayiş etdirdi. Qeyd etdiyim kimi, biz hər zaman əməkdaşlığa hazır olduğumuz kimi, burada da əməkdaşlığa tam hazırıq. BMT – nin ekspertlər qrupunun da buraya gəlməsi mühüm hadisədir. Beynəlxalq hüququn təminatçısı olaraq regionda iştirakı sülhün bərqərar olunmasına və gerçəklərin bir daha onlara göstərilməsinə şərait yaradacaqdır”.

Əkbər Novruz