“Hazırda iranlılar narkotik ticarət üçün Azərbaycandan tranzit yol kimi istifadə edir və ölkə daxilinə salır”.

Bu barədə Ednews-a açıqlamasında Narkomaniya üzrə ekspert Emil Maqalov qeyd edib. O, bildirib ki, torpaqlarımız işğaldan azad olunduqdan sonra yüzlərlə hektar narkotik plantasiyaları aşkar edilib və yaxın dönəmə qədər narkotik ticarətinin əsas qolu işğal olunmuş ərazilərimizdə ermənilərin əli ilə iranlılar tərəfindən istehsal olunan plantasiyalarda yetişdirilirdi.

Daha sonra ekspert ölkəmizdə narkotik aludəçilərinin artmasının səbəblərindən dədanışıb.  

“Son dönəmlərdə Azərbaycanda narkotik aludəçilərinin statistikasında artım olmasının bir neçə səbəbi var. İlk olaraq ölkəmizin yerləşdiyi coğrafi mövqe ilə əlaqədardır. Belə ki, dünyanın ən böyük narkotik ticarəti ilə məşğul olan ölkələri İran və Əfqanıstandır.  Əfqanıstan İranla sərhəddir, İran isə Azərbaycanla. Narkotikin yeniyetmələr və gənclər arasında yayılmasının bir digər səbəbi keçmiş dövrə baxdıqda hazırda  narkotikin hazırlanmasının daha da asanlaşmasıdır. Məsələn metanfitamin və amfetamin kimi kimyəvi maddələrə istifadə üçün əlavə heçnə lazım deyil. Ümumiyyətlə bu regionda narkotik istifadəsi həmişə olub. Sadəcə indiki dövrdə KİV-lərin bu məsələni daha çox işıqlandırması cəmiyyətdə istifadənin əvvəlki  dönəmə nisbətdə daha da çoxalmış kimi bir effekt verib. Statistik olaraq gün ərzində polis əməkdaşları  minumum 50 narkotaciri həbs edir. Son üç il ərzində ümumi  olaraq narkotacirlərin 20-30 faizinin qarşısı alınıb və alınmaqda davam edir”.

Emil Maqalov son olaraq qeyd edib ki, faktiki rəqəmlər göstəricilərdən dəfələrlə çoxdur:

“Bildirmək istəyirəm ki, narkomaniya ilə mübarizə tək polis qurumlarının işi deyil. Ümumilikdə bütün cəmiyyət bu bəla ilə mübarizə aparmalıdır. Hazırda Narkoloji dispanserə müraciət edən və yaxud tutularaq qeydiyyata salınan narkomanların sayı  35 min nəfərdir. Təbii ki, bir çox narkomanlar aidiyyatı qurumların və ya həkimlərdən yayınır və qeydiyyata düşmür. Faktiki rəqəmlər statistika göstəricilərindən  5-6 dəfə çoxdur”. 

Xəyal Ramiz