Rəsmi Kiyev bildirib ki, əgər Ermənistan Avropa, NATO, Fransa ilə əməkdaşlığı gücləndirirsə demək ki, düzgün yoldadır.
Bəs Ermənistanın Qərbə yönəlimi Azərbaycanla Avropa İttifaqı arasında münasibələrinə necə təsir edəcək? Avropa İttifaqı və ABŞ niyə Ermənistanı dəstəkləyir?
Mövzu ilə əlaqədar politoloq Tural İsmayılov Ednews-a açıqlamasında bildirib ki, ABŞ tarixi imperializmi davam etdirən və bu gündə neokolonialist siyasəti ilə birlikdə dünyada istismar siyasətini ayaqda tutmağa çalışan bir ölkədir:
“ABŞ-ın istirmarçı siyasətinin qarşısında regional əməkdaşlıqlar böyük bir əngəl kimi görünür. Çünki ABŞ başa düşür ki, Qafqaz və digər regionlarda formalaşan platformalar gələcəkdə ABŞ-ın həmin ölkələrə qarşı həyata keçirə biləcəyi hansısa bir imperialist hücumda hansısa məqsədlərə xidmət edən bir istilacı qəsd planında vahid ortaq müqavimət planlaşdıracaqlar.
Ona görə də ABŞ Qafqazda əməkdaşlıq istəmir və bunu mənafelərinə təhdid kimi görür”.
Politoloq vurğulayıb ki, digər tərəfdən Aİ ABŞ-ın bu siyasətini dəstəkləyərək Ermənistandakı missiyasını gücləndirir:
“Bu missiyanın gücləndirilməsinin səbəbidə Ermənistan ərazisində ikinci Ukrayna müharibəsi və yeni “Maydan planı” həyata keçirməkdir.
Birinci səfər müddətli, ikinci səfər isə müddətsiz şəkildə gələn Avropa İttifaqının Müşahidə Missiyasının konkret fəaliyyət mandatının nədən ibarət olduğu hələ heç kəsə tam bəlli deyil. Bu cür təşkilatların hər gün Ermənistan ərazilərində yeni ofisləri açılır.
Eyni zamanda indiyədək Avropa İttifaqı Şurasının rəhbərliyi və moderatorluğu ilə keçirilən Brüssel formatlarında əldə olunan razılaşmalarda və Brüssel bəyanatları ilə bağlı Ermənistan tərəfindən indiyə qədər faktiki olaraq praktiki addımlar atılmayıb.
Situasiyanın belə olduğu təqdirdə Fransanın Ermənistanı silahlandırması, ABŞ çox agressiv şəkildə birmənalı ermənipərəst siyasət yürütməsi Ermənistanı növbəti dəfə hərbi ekskalasiyaya təhrik edir.
Həmçinin Ermənistanın Azərbaycanla bağlı üzərinə götürdüyü öhtəliklərindən boyun qaçırmağına səbəb olur” .
Son olaraq politoloq qeyd edib ki, İrəvanın aktual olaraq əsas məqsədi mümkün qədər Qərbin Ermənistandakı mövcudluğunu hər bir sahədə dərinləşdirmək və daha sonra isə bundan istifadə edərək bölgədə yeni gərginlik ocaqları yaratmaqdır.
Xəyal Ramiz
