Ednews Rusiya Etnik və Beynəlxalq Araşdırmalar Mərkəzinin elmi direktoru Anton Bredixinlə müsahibəsini təqdim edir:
- Cənubi Qafqazda sülh prosesinin perspektivlərini necə dəyərləndirirsiniz? 2024-cü ildə Ermənistanla sülh müqaviləsi imzalamaq mümkün olacaqmı?
- Məncə, nə qədər ki, Nikol Paşinyan Ermənistanın rəhbəridir, Ermənistanla Azərbaycan arasında yekun sazişlərin imzalanması, mümkün olmayacaq. Yalnız hakimiyyət dəyişikliyindən sonra Ermənistanda ən azı müəyyən irəliləyiş əldə oluna bilər. Geridə buraxdığımız ilin bütün fəsillərində proqnozlar verilirdi ki, sülh sazişi üçün addım atılacaq, lakin görürük ki, hələ də ortada heç nə yoxdur.
- Fransanın Ermənistan vasitəsilə Cənubi Qafqaz regionuna nüfuz etmə ehtimalı nə qədərdir?
- Təbii ki, Fransa regionda öz təsirini maksimum dərəcədə artırmaq istəyən ölkədir. Düşünürəm ki, o, öz mövqeyini möhkəmlətmək naminə Ermənistandan kənara çıxacaq və güman edirəm ki, o, Gürcüstanın işlərinə daha çox qarışacaq. Və təbii ki, vəziyyəti özü üçün yenidən formalaşdırmağa çalışacaq və regional problemlərin həllinə tək onun qadir olduğunu göstərməyə cəhd edəcək.
- Qərb mediasında yazılanlara görə Avropa Şurasının prezidenti Şarl Mişel Avropa Parlamentinə namizədliyini irəli sürəcəyini açıqlayıb. Bu da öz növbəsində Mişelin tezliklə öz vəzifəsini tərk etməli olacağı anlamına gəlir. Onun vəzifəsinə ilkin namizədlərdən biri olan Viktor Orban təyin edilib. Bu cür mövqe dəyişikliyi regionumuza hansı yeni perspektivlər gətirə bilər?
- Hazırda Avropa Birliyində baş verənlərdən danışsaq, görərik ki, Şarl Mişelin əvəzinə böyük ehtimalla Viktor Orban vəzifəyə gələcək. Lakin belə bir fakt var ki, Viktor Orban həddən artıq rusiyapərəstdir və buna uyğun olaraq onun siyasəti konkret olaraq milli dövlətləri, milli dəyərləri, ənənəvi dəyərləri qoruyub saxlamağa yönəlib. O, Rusiyada qadağan edilən LGBT-yə və ya Avropa cəmiyyəti üçün mövcud olan, normaya çevrilən hər hansı başqa sapmalara dözməyəcək. Ona görə də təbii ki, əvəzində, Aİ ona qarşı başqa namizədləri irəli çıxarmağa çalışacaq. Çox güman ki, Orban Avropa İttifaqının rəhbəri olmayacaq.
- Son olaraq 2023-cü ildə Rusiyanın Cənubi Qafqazdakı siyasətini necə qiymətləndirərdiniz?
- Rusiya Cənubi Qafqazda öz təsirini, mövcudluğunu, dostluğunu, ilk növbədə İlham Əliyevlə dostluğunu maksimum dərəcədə artıra bildi və buna uyğun olaraq regiondakı hadisələri qiymətləndirdi. Düşünürəm Rusiyanın geridə buraxdığımız ildə regionda sərgilədiyi mövqeni sadəcə müsbət qiymətləndirmək olar. Buna uyğun olaraq biz görürük ki, Rusiya məhz Qərbin bu hücumlarına, Qərbin istəklərinə uğurla müqavimət göstərir, regiondakı mövqeyini qorumağa çalışırdı.
Əkbər Novruz