Şərqi Zəngəzurun aqrar potensialı bir çox xarici dövlətlərin diqqətindədir. Bu gün ən böyük potensial o dövlətlərin Azərbaycanla yeni razılaşma əldə etmək üçün təkliflər irəli sürməsidir.
Bəs, Azərbaycan Şərqi Zəngəzurda hansı aqrar fəaliyyətə başlaya bilər?
Məsələ ilə bağlı Ednews-a danışan millət vəkili Rüfət Quliyev bildirib ki, Şərqi Zəngəzur bölgəsində hər növ kənd təsərrüfatı sahələri üçün münbit şərait var.
“Burada bostançılıq, üzümçülük, tütünçülük və bağçılıq kimi aqrar sənayə sahələri üzrə fəaliyyət mümkündür. Region təkçə əkinçilik sahəsində yox, həm də maldarlıqda da ixtisaslaşmağa meyl edəcək. Ərazidə iribuynuzlu və xırdabuynuzlu heyvanların yetişdirilməsi də mümkündür.
Bu zona özünün təbii şəraiti sayəsində öz təlabatını ödəməyi bacaracaq. Həmin sahələrə yaxın yerlərdə emal sexləri və müəssisələri tikilməsi üçün bütün şərait də var. Cənab prezident İlham Əliyevin bu sahədə ən əsas şərti yeni texnologiyalardan istifadə edilməsidir”.
Şərqi Zəngəzurda həyata keçiriləcək kənd təsərrüfatı fəaliyyətlərini diqqət mərkəzində saxlayan ölkələr haqqında danışan deputat, region üçün aparıcı qüvvələrin Türkiyə və Rusiya sahibkarları olacağını da bildirib:
“Təbii ki, dövlət investisiyaları, Azərbaycanın sahibkarları və xarici qüvvələr yeni fürsətlər olduğu üçün mütləq Şərqi Zəngəzura investisiya qoyacaq. Azərbaycanın ən yaxın strateji müttəfiqi olan Türkiyə, Şimal qonşumuz Rusiya və bəzi Avropa ölkələri regiona investisiya qoyulmasında maraqlıdır.
Avropada Macarıstan, Serbiya və İtaliya kimi ölkələrlə əməkdaşlıq edilə bilər. Burada hansı Avropa dövlətinin Azərbaycanla müsbət münasibətlərinin olması əsas faktordur. Uzaq Şərq regionundan Çin son zamanlar Azərbaycanın kənd təsərrüfatı sektoruna maraq göstərir. Həm texnologiya, həm də aqrar sahələrdə ixtisaslaşmış olan Çinin də burada yeni iqtisadi fəaliyyətlərdə rol alacağı gözlənilir”.
Fərid