Tehranda səfərdə olan Serqey Şoyqu Rusiyanın İranla region məsələlərində hərtərəfli əməkdaşlığa hazır olduğunu bildirib. İranın isə bu günlərdə İsrailə hücum etməsi gözlənilir. Bu halda İsrailə qarşı Rusiya-İran alyansı yaradılacaq, yoxsa Rusiya Tehranın hərbi təminatçısı olaraq müharibədə biləvasitə davam edəcək?
“Qərbin tətbiq etdiyi sanksiyalar nəticəsində daxili və xarici tam bir çıxmazın içində olan İran, son dönəmlərdə ABŞ-la dialoqların yenidən başladılması üçün əlindəki bütün imkanları səfərbər etmiş və hətta son 45 ildə israrla üzərində durduğu bəzi prinsiplərdən vaz keçmişdi.”
Bu fikirləri Ednews-a açıqlamsında bildirən siyasi ekspert Çingiz Göytürk, Rusiyanın potensial İran-İsrail müharibəsinə birbaşa qoşulmayacağını vurğulayıb:
“Hətta bəzi hakimiyyət nümayəndələri İranın böyük himayəçisi olan Rusiyadan uzaqlaşmağın vacibliyini vurğulayıblar. Mən son dönəmdəki ölkə rəsmilərinin görüşləri və demək olar ki, eyni məzmunlu bəyanatları ilə bu zaman zərfində ortaya çıxan tərəddüdlər və ikili münasibətlərdə qarşılıqlı güvənin yenidən gerçəkləşdiyini düşünürəm. Ancaq, Rusiyanın İranın İsrailə qarşı hər hansı atacağı bir addımda İranla çiyin-çiyinə müharibəyə daxil olacağını düşünmürəm. Çünki, Rusiyanın həm iqtisadiyyatı, həm də hərbi potensialı özəlliklə Ukrayna savaşı davam etdiyi bir ərəfədə yeni bir savaşı heç bir şəkildə qaldıra bilməz.”
Ekspert bildirib ki, İran iqtisadiyyatı İsraillə müharibəyə tab gətirməyəcək və bu müharibə bütün Qrb dövlətləri ilə müharibə deməkdir:
“Ehtimal olunan savaş durumda isə Rusiya öz silahlarını İran bazarına çıxaracaqdır. Lakin, İranın İsrailə qarşı hərtərəfli savaş açmaq ehtimalı çox azdır. Çünki, əvvəla çökmüş durumda olan İran iqtisadiyyatı hər hansı bir savaşı qaldırmaq iqtidarında deyil. Ona görə ki, müharibə vəziyyətində İran iqtisadiyyatının kontroldan çıxma ehtimalı həddindən artıq yüksəkdir. İran əgər İsraillə müharibəyə başlasa bütün Qərblə savaşa girəcək. Belə bir şəraitdə ölkə niyə drumadan savaş fikirlərini sürətləndirir deyə soruşsanız, düşüncəmə görə, Qərblə bir müddət öncə başlayan dialoqları sürətləndirmək və bunu gərginlik yaratmaq yolu ilə etmək istəyir.”
Fərid Axund
