"Bütün hüquqi vasitələrdən istifadə edəcəm".

Ötən gün "Bələdiyyə seçkiləri"nin nəticəsi açıqlandıqdan sonra azinforum-a müsahibə verən jurnalist Sevda Zülfüqarlı seçki nəticələrinin dəyişdirildiyini iddia edib.

O, Araz Əlizadənin partiyasından olan xanımın topladığı fantastik səs sayının qalmaqal yaratdığını bildirib.

Belə ki, bələdiyyə seçkilərində rəsmi nəticənin elan olunmasından sonra, ortaya çıxan rəqəm sosial şəbəkələrdə böyük müzakirələrə səbəb olub. 

Xətai Bələdiyyəsinə  keçirilən seçkilərdə Araz Əlizadənin rəhbəri olduğu ASDP-nin təmsilçisi kimi  iştirak edən Abdullayeva Səbinə Hidayət qızının 22362 səs topladığı məlum olub.

Həmin dairədən namizəd olan və seçki prosesində olduqca aktiv təbliğat aparan jurnalist Sevda Zülfuqarlı azinforum-a açıqlamasında bildirdi ki, bu nəticə ilə razılaşa bilməz:

“Əminəm ki, heç o sayda səsi Araz Əlizadənin özü də toplaya bilməz. Hamı bilir ki, mən olduqca aktiv seçki təbliğatı aparmışam. Əminəm ki, bir çox tanıdığım, görüşlərdə təmasda olduğum adamlar mənə səs verib. Belə olan halda, necə olur ki, mən cəmi 32 səs toplayıram, ancaq heç kimin tanımadığı bir xanım isə 23 minə yaxın səs yığır? Mən layiqli məğlubiyyəti qəbul edərdim, ancaq bu fantastik və reallığa yaxın olmayan  fərqlə razılaşa bilmərəm. Şəffaflığın təmin olunması üçün bütün hüquqi vasitələrdən istifadə edəcəm”.