Artıq bir müddətdir ki, parlamentin buraxılması və yenidən seçkilərin keçirilməsi ilə bağlı cəmiyyətdə fikirlər dolaşır.
Hətta bir müddət əvvəl parlamentdə deputatların sayının artırılması da təklif olunurdu. Bunu konstitusiyaya dəyişiklik üçün referendumun keçirilməsi və digər səbəblərlə də əlaqələndirənlər var idi.
Xatırladaq ki, Milli Məclisə keçirilən seçkilərdən 3 il keçsə də boş qalan 5 yer üzrə hələ də yeni seçkilər təyin olunmayıb.
Bir müddət əvvəl Mərkəzi Seçki komitəsinin sədri Məzahir Pənahov tezliklə seçkilərin keçirilməsi barədə açıqlama versə də, hələ ki, bu istiqamətdə nisbi sakitlikdir.
Bu səbəb də parlamentin buraxılması haqqında gəzən söz-söhbəti daha da aktuallaşdırır.
Müxalifət partiyalarının liderləri bu barədə nə düşünür?
Məsələnin aktuallığını nəzərə alaraq ilk olaraq, Azərbaycan Xalq Partiyasının sədri Pənah Hüseynin fikrlərini dinləmək istədik. Partiya sədri Ednews-a açıqlamasında bildirib ki, bu, ictimai rəydə formalaşmış qeyri-rəsmi ehtimallardır.
“Parlamentin buraxılması və yenidən seçkilərin keçirilməsi fikri bir müddətdir ki, var. Konstitusiyada dəyişiklik üçün referendum gözlənilir. Referendumda o cümlədən, seçki sistemi dəyişilib ya tam proporsional, ya da qarışıq, majoritar və proporsional seçki sistemi tətbiq olunacaq. Bu baxımdan ehtimal olunur ki, vaxtından əvvəl seçkilər keçirilə bilər. Hesab edirəm ki, ölkədə ciddi seçki islahatı aparılmalıdır. Proporsional seçki sistemi də tətbiq olunmaqla azad, demokratik seçikilər keçirməklə yüksək etimada malik bir parlamentin formalaşdırılması indiki vəziyyətdə bizim bir sıra problemlərin həlli üçün effektiv yollardan biridir”.
Müasir Müsavat Partiyasının sədri Hafiz Hacıyev isə düşünür ki, parlament bu gün özünü doğrultmur. Onun fikrincə, parlament mütləq şəkildə buraxılmalıdır.
“Bir deputat bu gün polis döydüyü üçün həbsdədir, digəri Azərbaycanın milyonlarını xaricdə gizlədir. Bu sizin, bizim, Azərbaycan xalqının puludur. Parlamentdə oturan deputatlar Azərbaycan dövlətçiliyinə xəyanət edir və dövlət başçısının gördüyü işlərə kölgə salırlar. Əlbəttə, parlamentdə ləyaqətli insanlar da var, ancaq əksəriyyəti təyin edilib.
Parlament buraxılmalı, yenidən demokratik seçkilər keçirilməli, proporsional seçki sistemi bərpa olunmalıdır. Düşünürəm ki, bu yöndə ciddi işlər görmək olar və Azərbaycan xalqının gələcək milli mənafeyi baxımından, Qarabağda görülən işlərin daha da sürətləndirilməsi naminə parlament təcili buraxılmalıdır".
Ağ Partiyanın sədri Tural Abbaslı isə qeyd etdi ki, parlamentin buraxılacağı barədə şayə artıq çoxdandır ki, var.
“Parlamentin formalaşmasında “5-ci kolon” dediyimiz Mehdiyev və onun ətrafının rolu olduğu üçün belə fikirlər bir ildən çoxdur ki, var. Amma görünən odur ki, hakimiyyət hələ ki, boş qalmış 5 yerə belə seçki keçirmir. Buna görə bu məsələləri mən ciddi qəbul etmirəm. Amma lazımdırmı? Təbii ki, lazımdır. Parlament buraxılmalı və yenidən ən azı xalqın etimadının 30-40 fazi belə olan bir parlament formalaşdırmaq lazımdır. Çox böyük ehtimal ki, tezliklə referendum keçiriləcək, konstitusiyaya dəyişiklik ediləcək. Düzdür, bununla bağlı siyasi bəyanat yoxdur. Düşünürəm ki, referendum keçirilməli, proporsional seçki də olmalı, parlament buraxılmalı və yenidən seçilməlidir. Ondan sonra normal siyasi münasibətlər formalaşacaq".
Müsavat Partiyasının başqanı Arif Hacılı qeyd etdi ki, parlamentin buraxılması yaxşı olardı, ancaq bundan əvvəl ilk növbədə ciddi seçki islahatları aparılmalı, seçki qanunvericiliyində dəyişikliklər edilməlidir.
“Seçki komissiyalarının paritet əsaslarda formalaşması, proporsional seçki sisteminin tətbiq edilməsi, deputatların sayının heç olmasa 201-ə qaldırılması, seçki kampaniyasının müddətinin uzadılması və s. bu kimi məsələlər həll olunduqdan sonra ölkədə növbdənkənar parlament seçkiləri keçirilsə, Azərbaycanda normal fəaliyyət göstərən qanunvericilk orqanının yaradılması mümkün ola bilər”.
Gülnar Səlimova