“Mart ayında mən Beynəlxalq Avrasiya Mətbuat Fondunun (BAMF) dəvəti və ANAMA-nın dəstəyilə Azərbaycana etdiyim səfər çərçivəsində Qarabağda mina sahələrində oldum. Mən bu illər ərzində çox sayda mina sahələrini gəzdim və bunun insanlığa qarşı ən böyük cinayət olduğunu düşünürəm”.
Ednews xəbər verir ki, bu sözləri “Sülhün Kökləri” təşkilatının qurucusu və rəhbəri Heidi Kühn Bakıda keçirilən “Humanitar Minatəmizləmə Fəaliyyəti və Dayanıqlı İnkişaf Məqsədləri” adlı beynəlxalq konfransda onlayn çıxışı zamanı bildirib. O, bildirib ki, bu davamlı inkişaf məqsədi üçün fəaliyyətə çağırış çox ciddi çağırışdır.
“Çünki biz buna Ukraynada və bütün dünyada şahid oluruq. 1997-ci ildə mən mərhum şahzadə Diananın faciəli ölümündən qısa müddət sonra minalarla bağlı məsələni beynəlxalq gündəmin ön sırasına çıxararaq “Minaları üzümlüyə çevirək” sloqanı ilə sülhün kökünü yaratmağa başladım. Son statistikalara görə, dünyada hələ də 60 ölkədə piyada əleyhinə 60 milyon mina var.
Çox təssüflə qeyd etmək istərdim ki, baxmayaraq ki, 25 ildir “Sülhün kökləri” ilə bu işlə məşğuluq, hələ də dünyada minaların sayı azalmayıb”.
Heidi Kühn çıxışı zamanı “Sülhün kökləri” təşkilatının ilk yaranma tarixindən, onun həyata keçirdiyi mina təmizlənmə təşəbbüsü haqqında da xatırladıb.
“Mən ilk addımlarımı Macarıstanda başladım. Orada Balkan müharibəsindən sonra torpağa 1.2 milyon ədəd mina basdırılmışdı. Lakin şərabçılıqla məşğul olan bir xorvatiyalı Parisdə üzümçülük müsabiqəsinin qalibi olur. O, bu ənənəni yaşatmaq üçün vətəninə dönür, lakin gördüyü mənzərə onu məyus edir, çünki hər tərəf mina sahəsinə çevrilmişdir.
Hazırda Macarıstana baxanda düşünürəm ki, biz bu 25 ildə orada böyük işlər gördük və ölkə turistlərin ən çox üz tutduğu məkandır. Ona görə mən dünyada sülhə inanıram. Ancaq sülhün təməli minanın çıxarılması ilə başlayır. Mən bu səyahətimi 11 Sentyabr hadisəsindən qısa müddət sonra bu gün dünyanın ən çox minalanmış ölkəsi olan Əfqanıstanla davam etdirirəm. Orada təxminən 10 milyon mina var, lakin həmçinin ora ən yüksək kənd təsərrüfatı istehsalı və iş yeri olan bir ölkədir”.
Heidi Kühn həmçinin bu xeyirxah missiyasında ona dəstək olan insanlara da öz təşəkkürünü bildirib.
“Bu gün mən 10 milyon dollar sərmayə ilə Əfqanıstanda bir çox işlər görə bildiyimizə görə, hər kəsə öz minnətdarlığımı bildirirəm. Hazırda mən ABŞ Dövlət Departamenti, Beynəlxalq Narkotik Hüquq Mühafizəsi ilə bu işləri həyata keçirmək üçün 45 milyon dollarlıq müqavilə imzalamağı bacarmışam.
Biz bu torpaqları-Əfqanıstan və Mərkəzi Asiya torpaqlarını minalardan təmizləyib orada yeni dünya qururuq. Bu torpaqlara 250 milyon - 1.4 milyard dollar sərmayə xərcləmişik”.
Sonda “Sülhün Kökləri” təşkilatının qurucusu fikirlərini belə tamamlayıb:
“Mən Qarabağı gəzərkən Umudun uşaqlığı keçən bu torpaqlarda bir zamanlar çiçəklənən gözəl üzüm bağlarını görəndə anladım ki, burada sülh mümkün olacaq. Ona görə biz yalnız sülh işinə əsaslanaraq diqqətimizi cəmləməliyik. Hesab edirəm ki, hazırda işlədiyimiz bu ölkəni yüksəltməyimiz tamamilə vacibdir. 1970-ci illərdə, mən Kaliforniya Universitetində tələbə olarkən, Vyetnam müharibəsi qızışırdı, lakin bu gün Vyetnamda biz 10.000-dən çox fermerə təlim keçirik və MAG-nin dəstəyi ilə biz minlərlə mina təmizlədik.
Hazırda biz Ukraynada müşahidə etdiyimiz müharibə dəhşətlərini görürük. Xatırlayaq ki, bu yaz əkin mövsümüdür, onu silahla deyil, kürəklə aparmalıyıq. Ukrayna kənd təsərrüfatı baxımından çox məhsuldar bir ölkədir. Ukrayna dünya üzrə buğdanın 10 faizini, qarğıdalının 15 faizini yetişdirir və günəbaxan yağının yarısını istehsal edir. Bildiyimiz kimi, yazda əkilməyən torpaqda, payızda heç bir məhsul yığıla bilməz.
Mən Beynəlxalq Avrasiya Mətbuat Fondu və ANAMA ilə birgə işləməyi səbirsizliklə gözləyirəm. Düzdür, bu missiya uzun vaxt aparacaq, səbr və maddi yatırım tələb edəcək, lakin Azərbaycan mina sahələri üzüm bağlarına çevirmək potensialının episentrinə çevrilməlidir.
Mən çıxışımı 2002-ci ildə Birləşmiş Millətlər Təşkilatının qarşı tərəfində yerləşən Əşiya Divarından asılan sərlövhədən olan sitatla bitirmək istərdim.
“Qılınclarını şum, qalxanlarını oraq etsinlər ki, xalq xalqa qarşı qılınc qaldırmasın, daha döyüşməyi öyrənməsinlər”.
Təşəkkür edirəm!”
Qeyd edək ki, Beynəlxalq Avrasiya Mətbuat Fondu Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə icra etdiyi ““Minasız Azərbaycan, Təhlükəsiz Qarabağ” beynəlxalq konfransına hazırlıq” layihəsi çərçivəsində həyata keçirdiyi fəaliyyətlərlə konfransın işinə öz töhvəsini verib.