Ermənistanın İrəvan şəhərində ermənilərin milli qəhramanının abidəsini təhqir ediblər.
Belə ki, İrəvan sakini Karen Xaçaturyan “milli qəhrəman” Leonid Azqaldiyanın heykəlini murdarlayaraq, burnunu sındırıb. Xaçaturyan Hraparak qəzetinə açıqlamasında öz hərəkətinə haqq qazandırb və Azqaldiyanı satqın hesab edib.
Onun sözlərinə görə, Leonid Azqaldiyan və onun kimləri üzündən erməni xalqı son 30 ildə saysız qurbanlar verib. Ermənistanın hazırda bu günə düşməsinin əsas səbəbkarları məhz onlardır.
İrəvan sakini erməni millətçilərinin 90 - ci illərdə Azərbaycana qarşı mənasız quldur hücumları təşkil etdiyini, ölkəsinin qoşusunun torpaqlarını 30 il ərzində işğal altında saxladığını bildirib. O, həmçinin azərbaycanlıların erməni xalqı ilə düşmən olmadığını, onlara pislik etmədiyini, Qarabağın Azərbaycan torpağı olduğunu qeyd edib.
“Azərbaycanlılar bizim torpaqları işğal ediblər? Bizi kütləvi şəkildə qətl ediblər? Onlar bizə nə ediblər, axı?”, – deyə Xaçaturyan erməni millətçilərinə sual ünvanlayıb.
Politoloq Zərdüşt Əlizadənin fikrincə, II Qarabağ müharibəsi Ermənistanda bir çoxlarına yaxşı dərs oldu və ağılları başlarına gəldi. Onun sözlərinə görə, Ermənistanın 44 günlük müharibədə ağır məğlubiyyətə uğraması erməni cəmiyyətini nəinki qəflət yuxusundan oyatdı, həmçinin xəstə millətçi xəyallarından xilas etdi.
“İkinci Qarabağ müharibəsindən əvvəl Ermənistanda xalq arasında radikal millətçilik və “Böyük Ermənistan” nağılları hökm sürürdü. Bu ölkədə ifrat millətçilər, həyasızlar və müharibə tərəfdarları çoxluq təşkil edirdi. Münaqişənin başladığı vaxtlarda erməni millətçiləri türk kəndlərini hücum edib yandırırdılar və dinc sakinləri öldürürdülər. Əlbəttə, bu qırğınlara və qətliamlara qarşı çıxan ermənilər də var idi. Lakin onlar qorxularından səslərini çıxara bilmirdilər.
Həmin ermənilər radikal millətçiliyin və təcavüzkarlığın gətirəcəyi bəlalardan söz açarkən təhlükələrlə üzləşirdilər”.
Politoloqun sözlərinə görə, vaxtı ilə erməni ictimai xadimi Georgi Vanyan Azərbaycan və erməni xalqları arasında düşmənçiliyin sona çatması və hər iki xalqın yenidən bir araya gəlməsi üçün əlindən gələni edirdi.
“Georgi Vanyan ifrat erməni millətçiliyini sərt və kəskin şəkildə pisləyirdi. Millətçiliyi erməni xalqı üçün böyük bəla hesab edirdi. Buna görə də o, erməni millətçilərinin tez-tez hədəfinə tuş gəlirdi. Ona bu missiyasına görə əzab verirdilər”.
Zərdüşt Əlizadə Ermənistanda sülh tərəfdarlarının artdığını təsdiqləyib. O, bildirib ki, Paşinyan hakimiyyətinin sülh naminə işlər görməsi ölkədə bir çoxlarını sülh və barışıqla bağlı fikirlərini sərbəst ifadə etməyə şövqləndirib.
“Keçən il keçirilən parlament seçkilərində Paşinyanın rəhbərlik etdiyi partiyanın qələbə çalması erməni xalqının əksəriyyətinin müharibəni rədd etdiyini və sülhü dəstəklədiyini göstərir. Bu ölkədə revanşistlər ortada görünsə də, sülh tərəfdarları da kifayyət qədərdir. Hesab edirəm ki, Azərbaycan dövləti və cəmiyyətimiz Ermənistanın sülh naminə mübarizə aparan şəxsləri ilə əməkdaşlıq etməlidir. Yalnız bu yolla hər iki xalq arasında əvvəlki mehriban qonşuluq münasibətlərini bərpa etmək olar”.
Yunis Abdullayev
