“Ermənistan rəhbərliyi boş bəyanatlar verməklə sülh prosesindən yayınmağa çalışır”.
Bu sözləri Ednews-a açıqlamasında politoloq İlqar Vəlizadə Ermənistanın Təhlükəsizlik Şurasının katibi Armen Qriqonyanın Azərbaycanla sülh müqaviləsi ilə bağlı açıqlamasını şərh edərkən bildirib.
Onun sözlərinə görə, Ermənistan hakimiyyəti köhnə və ənənəvi taktikalardan istifadə etməklə vaxtı uzatmaq və diqqəti əsas məsələlərin həllindən başqa səmtə yönəltməyə istiqamətlənib
“Son nəticə etibarı ilə İrəvan hazırki status-kvonu saxlamağa çalışır. Halbuki, biz 44 günlük müharibədə əvvəlki status-kvo ilə bağlı bütün məsələləri və problemləri hərbi-siyasi yoll ilə həll etdik.. Bu gün Qarabağla əlaqəli olan məsələlər öz aktuallığını itirib. Təəssüflər olsun ki, Ermənistan tərəfi vəziyyəti bu cür görmür. Onlar bəyan edirlər ki, münaqişə hələ qalıb, qeyri-müəyyən məsələlər öz həllini tapmayıb və Qarabağın status məsələsi yenidən gündəmə daxil olmalıdır. Bu siyasət isə sülh prosesinin ahəngini pozur və regionu münaqişə dövrünə qaytarmaq məqsədi güdür. Bunun belə davam etdiyi təqdirdə danışıqlar prosesi uğursuzluğa düçar olacaq”.
Politoloqun fikrincə, Azərbaycan növbəti dəfə hərbi yola baş vura bilər.
“Azərbaycan Ermənistanın bu cür hərəkətlərini yalnız hərbi-siyasi taktika ilə qarşısını ala bilər. Bu tendisiyanın davam etməsi bölgədə ordumuz tərəfindən geniş miqyaslı hərbi əməliyyatlara gətirib çıxaracaq. Nə qədər ki, ərazilərimizdə separatçı ünsürlər mövcuddur və ölkəmizin təhlükəsizliyinə təhdidlər olunur, hərbi ssenari aktual olaraq qalacaq”.
İlqar Vəlizadə, həmçinin bildirib ki, xarici qüvvələr Ermənistanın taleyi ilə oynayırlar.
“Bütün siyasi oyunlar Ermənistanın başında çox pis çatlayacaq. Biz gözləmək mövqeyindəyik, amma səbrimizin həddi də var. Qarabağda və Ermənistanla sərhəd ərazilərdə konkret planlar üzrə işlər gedir. Bu işlər ölkəmizin təhlükəsizliyinə, suverenliyinə və ərazi bütövlüyünün təmin olunmasına istiqamətlənib. Biz bu prosesi məqsədimizə nail oluna qədər davam etdirəcəyik”.
Qeyd edək ki, Ermənistanın Təhlükəsizlik Şurasının katibi Armen Qriqonyan açıqlamasında bildirib ki, İrəvan Qarabağ problemi həll edilmədən Azərbaycanla sülh müqaviləsi imzalamayacaq.
Yunis Abdullayev