30 il ərzində UNESCO-nun Azərbaycana qarşı olan qərəzli mövqe sərgiləməsinin dəfələrlə şahidi olmuşuq. Bu beynəlxalq təşkilata olan müraciətlərimizə cavabın verilməməsi, yeri gələndə ermənipərəst çıxışalarının da olması onun nə qədər qərəzli olduğunu sübut edir.

Maraqlıdır ki, UNESCO-nun Azərbaycana qarşı qərəzli mövqeyinin səbəbi nədir? 

Bu barədə beynəlxalq hüquq və geosiyasət üzrə ekspert Əfsər Sadıqov fikirlərini Ednews üçün bölüşüb.

“UNESCO Fransada yerləşir. Beynəlxalq təşkilatlar həmişə yerləşdiyi ölkənin təsir dairəsində olur. Bu UNESCO üçün daha xarakterikdir. Nəzərə almaq lazımdır ki, Fransanın dövlət xadimləri də bu istiqamətdə siyasət yürüdürlər. Son zamanlar Fransa senatının qərarları da hamıya məlumdur. Bu da öz növbəsində prosesə öz təsirini göstərir. Yəni, bu dövlətin bütövlükdə siyasəti həmçinin onun ərazisində yerləşən UNESCO üçün də xarakterikdir. Biz Ermənistan-Azərbaycan münaqişəsinə dair UNESCO-ya nə qədər faktlar təqdim etsək də UNESCO-nun məhkəmə mexanizminin olmaması, erməni lobbisinin təsir dairəsində olması da buna təsir edir. Onlar Azərbaycana qarşı qərəzli siyasətlərini də həyata keçirirlər”.    

Hüquqşünas həmçinin qeyd edib ki, UNESCO-nun ermənipərəst siyasətinin səbəbini beynəlxalq məhkəmələrdə tələb etmək haqqımız var.

“Mehriban xanım Əliyevanın UNESCO-dakı xoşməramlı səfiri kimi fəaliyyətini dayandırması da Azərbaycanın UNESCO-ya qarşı etirazlarının başlamasının sübutudur. Hazırda bunu humanitar sanksiya kimi də qəbul etmək olar. Bununla bağlı bir sıra iqtisadi tədbirlər də görülə bilər. Azərbaycan Respublikası ilə UNESCO arasında bütün əməkdaşlıq formalarını gözdən keçirməliyik. Yalnız UNESCO-ya  deyil, o cümlədən, Azərbaycan Respublikası  Fransa dövlətinə qarşı öz tədbirlərini görməyə başlamalıdır. Çünki Fransa Senatının qərarı Azərbaycan Respublikasının ərazi bütövlüyünə, siyasi suverənliyinə qəsddir. Bunun nəzərə alaraq, Azərbaycan Respublikası bu dövlətin Azərbaycanda yerləşən bütün mal varlığına əl qoymalıdır. O cümlədən də, Azərbaycan UNESCO-dan üzvlüyünün dayandırılmasını təmin etməlidir”.

Ayan Rzayeva