“Fransa Senatının antiazərbaycan məzmunlu qətnaməsi şəxsən məni təəccübləndirmədi. Çünki bu, birinci dəfə deyil. 44 günlük Vətən müharibəsinin elə ilk günlərində Fransa Prezidenti belə bir bəyanat vermişdi: "Azərbaycan Dağlıq Qarabağı fəth etmək istəyir və biz buna icazə vermərik".
Bu sözləri Ednews-a Milli Məclisin deputatı Ülvi Quliyev Fransa Senatının Azərbaycan əleyhinə qətnamə qəbul etməsinə fikir bildirərkən deyib.
O, qeyd edib ki, Beynəlxalq hüquqa zidd olan və Fransanın az qala otuz illik vasitəçilik fəaliyyətinin iç üzünü ortaya qoyan bu bəyanatı cəmiyyətimizdə kimsə unuda bilərmi? Yaxud, qondarma "Dağlıq Qarabağ Respublikasının tanınması" ilə bağlı Fransa Senatının müharibədən dərhal sonra qəbul etdiyi qətnamə də bir daha göstərdi ki, bu ölkənin istər Minsk qrupu çərçivəsindəki fəaliyyəti, istərsə də son iki ildəki vasitəçilik təşəbbüsü sülhə deyil, işğal faktı ilə bağlı status-kvonun saxlanılmasına, nəticə etibarı ilə erməni separatçılığının təşviqinə xidmət edir.
“Fransa Senatının 15 noyabr tarixli qətnaməsində Silahlı Qüvvələrimizin suveren ərazimiz olan Laçın dəhlizindən çıxarılması tələb olunur. Bu, Azərbaycanın beynəlxalq səviyyədə tanınan əraziləri üzərindəki suveren hüquqlarına, beynəlxalq hüquq normalarına və BMT Nizamnaməsinə aşkar hörmətsizlik deməkdir. Bu cür qərəzli qərar və addımların yalnız bir izahı var. Fransa rəsmiləri üçün "sevimli başçılarının" şıltaqlığı Azərbaycanla dostluq və etibarlı tərəfdaşlıq münasibətlərindən daha qiymətlidir. Azərbaycan cəmiyyəti Fransa Senatının və digər rəsmilərinin vazkeçilməz erməni sevgisini anlayışla qəbul edə bilər. Yalnız o halda ki, bu, müstəqil Azərbaycanın dövlət maraqlarının və beynəlxalq hüquq normalarının pozulması hesabına baş verməsin. Ona görə də, hara kimi sevəcəklər, kim kimin şıltaqlığına hara qədər dözəcək, özləri bilər. Müstəqil Azərbaycanın isə qardaş və dost ölkələr, eləcə də etibarlı tərəfdaşlar baxımından heç bir narahatlığı yoxdur. Ən başlıcası, ölkəmizi həmin dövlətlərlə birləşdirən bərabərhüquqlu münasibətlərdir. O münasibətlər ki, onun əsasını etibarlılıq və yalnız öz vətəninə, öz dövlətinə sevgi və ləyaqətli davranış təşkil edir. Ləyaqəti qiymətləndirənlərlə bir yerdə olmaq isə türkün alın yazısıdır”.
Oğuz Ayvaz
