Bu gün Yeni Azərbaycan Partiyasının (YAP) yaradılmasından 30 il ötür.
Xatırladaq ki, Yeni Azərbaycan Partiyasının yaradılması müstəqilliyini yenicə bərpa etmiş Azərbaycanda hakimiyyətin milli maraqlara zidd siyasəti nəticəsində ölkədə ictimai-siyasi böhranın, iqtisadi tənəzzülün hökm sürdüyü dövrə təsadüf edir. O zaman müstəqilliyinin itirilməsi təhlükəsi ilə üzləşən Azərbaycanın ümidi müdrik dövlət xadimi, zəngin dövlətçilik təcrübəsinə malik olan, öz fəaliyyətində xalqın ali mənafeyini, dövlətin milli maraqlarını rəhbər tutan görkəmli siyasi xadim Heydər Əliyevə idi. 1992-ci ilin oktyabrında bir qrup Azərbaycan ziyalısı ona müraciət edərək Yeni Azərbaycan Partiyasının yaradılmasını təklif etdi. Ümummilli lider Heydər Əliyev isə ziyalılara göndərdiyi 1992-ci il 24 oktyabr tarixli cavab məktubunda Yeni Azərbaycan Partiyasının yaradılmasına və ona rəhbərlik etməyə razılıq verdi. 1992-ci il noyabrın 21-də ulu öndər Heydər Əliyevin sədrliyi ilə Yeni Azərbaycan Partiyasının təsis konfransının keçirilməsi yeni müstəqil Azərbaycanın tarixində parlaq gələcəyin əsasını qoydu.
Ednews YAP-ın Azərbaycanın siyasi həyatında rolu barədə bir sıra siyasi partiya sədrlərindən münasibət öyrənib. Cavabları təqdim edirik.
Müasir Müsavat Partiyasının sədri Hafiz Hacıyev açıqlamasında bildirdi ki, YAP 30 illik tarixi dövründə Aəzrbaycanın siyasi həyatında olduqca şərəfli və məsuliyyətli yol qət edib.
“YAP ümummilli lider Heydər Əliyevin ideyaları, uzaqgörənliyi və qətiyyəti nəticəsində yaradılan bir partiyadır. Azərbaycan siyasi mühitinin ən güclü siyasi qüvvəsi olan Yeni Azərbaycan Partiyasının möhtəşəmliyinin bariz təzahürü onun cəmiyyətin bütün sosial-ictimai maraqlarının ifadəçisi olmasıdır. Yeni Azərbaycan Partiyasının Heydər Əliyev tərəfindən qoyulan inkişaf strategiyasını, cənab prezident, İlham Əliyev uğurla həyata keçirir. Buna görə də ölkəmiz regionda güc amilinə, Avropada və dünya birliyində söz sahibinə çevrilib. Prezident İlham Əliyevin rəhbərliyi ilə Yeni Azərbaycan Partiyası böyük nailiyyətlər qazanıb.
Bu gün 30 illik uğurlu siyasi fəaliyyətin qələbəsini Qarabağın azad olunması təntənəsi ilə qeyd edirik. Bu əlamətdar hadisə münasibətilə cənab İlham Əliyevi və bütün partiya fəallarını təbrik edirəm”.
Gələcək Azərbaycan Partiyasının sədri Ağasif Şakiroğlunun sözlərinə görə təxminən 2 ilə yaxındır ki, iqtidar və müxalifət partiyaları arasında dialoq aparılır. Bu dialoqun çərvivəsində siyasi partiyaların dövlət qeydiyyat problemi, mənzil qərargah problemləri, eyni zamanda illərdi yığılıb qalmış problemləri həllini tapmış oldu.
“Biz müxalif partiya olaraq hər zaman iqtidar mənsublarının qarşısında siyasi partiyaların dövlət protokoluna salınması məsələsini qaldırırdıq. Hesab edirəm ki, bu günləri YAP-ın 30 illik yubiley tədbirinə müxalif siyasi partiyaların hər birinin ayrı-ayrılıqda dəvət edilməsi yüksək diqqət göstərilməsi Azərbaycanda yeni siyasi münasibətlərin təməlini qoymuş olacaq. Aparılan iqtidar-müxalifət dialoqu çərvivəsində yeni siyasi partiyalar haqqında qanun qüvvəyə mindikdən sonra müxalif partiyaların dövlət protokoluna salınması ilə nəticələnək. Bu günkü yubiley törəni gələcəkdə iqtidar-müxalifət münasibətlərinin daha da dərinləşməsinin belə desək, “qaranquşu” idi. Biz rəqib, alternativ ola bilərik. İqtidarın ünvanına səsləndirdiyimiz fikirlər onlar üçün xoş gəlməyə bilər. Çünki bu çıxışlar tənqiddir. Amma, əminəm ki, düşmənçilik olmamalıdır. İqtidar da belə qəbul edir ki, müxalifətin sağlam arqumentlərinə qərəzssiz etdiyi tənqidlər dövlətimizin, millətimizin, xalqımızın inkişafı üçündür”.
"Mili İnkişaf" İctimai Birliyinin sədri Arzuman Muradlı YAP-ın yubilyei ilə bağlı qeyd edib ki, 30 ilin böyük bir dövrünü hakimiyyət partiyası kimi fəaliyyət göstərmək hər bir siyasi qüvvənin bacaracağı iş deyil. Bu faktın özü də onu deməyə əsas verir ki, Yeni Azərbaycan Partiyası regionun ən güclü siyasi təsisatıdır.
“Bu gün də Yeni Azərbaycan Partiyası hakimiyyət partiyası olaraq ölkənin inkişafı, əhalinin sosial rifah halının yaxşılaşdırılmasına öz töhfəsini verir. Məhz bu amildir ki, Yeni Azərbaycan Partiyası haqlı olaraq xalqın partiyası adlandırılır.
Əsası ümummilli lider Heydər Əliyev tərəfindənb qoyulan YAP-da bu gün də Onun ideyaları, müəyyənləşdirdiyi yol əsas ana xətt kimi götürülür və bu yolla irəliləyən Yeni Azərbaycan Partiyası ildən-ilə yeni uğurlara imza atır. Birmənalı olaraq qeyd edə bilərik ki, Yeni Azərbaycan Pariyası bundan sonra da Cənab Prezident İlham Əliyevin rəhbərliyi altında yeni-yeni nailiyyətlərə imza ataraq Azərbaycanı daha da zirvələrə qaldıracaq".
Oğuz Ayvaz
