Hraparak qəzetinin məlumatına görə, qondarma rejimin rəhbəri Arayik Arutyunyan rus sülhməramlılarının ailələrini Qarabağa köçürülməsi üçün Rusiya Federasiyasının ən yüksək məhkəmə instansiyalarına müraciət edib.

Ermənistanda Qərbin təsiri artdığa halda Qarabağda erməni separatçıları Rusiyaya söykənməyə çalışırlar.

Maraqlıdır, Aratyunyan bu istiqamətdə addım atmaqla nə məqsəd güdür?

Məsələ ilə bağlı Ednews-a açıqlamasında politoloq Asif Nərimanlı qeyd edib ki, Ermənistan hakimiyyəti artıq yaxasını qırağa çəkib və Qarabağda separatçı rejimin mövcudluğu birbaşa Rusiyadan asılıdır.
Onun sözlərinə görə, sülhməramlıların ailələrini bu ərazilərə gətirməklə bir sıra məqsədlər güdülür.

"Sülhməramlıların ailələrinin gətirilməsi daha çox onların bölgədə müddətinin uzadılmasına hesablanıb. Separatçılar çox yaxşı başa düşür ki, iki ildən sonra sülhməramlılar Qarabağı tərk edəcəklər və bununla onların taleyi birdəfəlik həll olunacaq. Yəni, onlar bölgədə bundan sonra qala bilməyəcəklər. Ailələri yerləşdirmək yolu ilə sülhməramlı kontingentinin qalma müddətini uzatmağa çalışırlar. Burada başqa bir məqama da diqqət yetirmək lazımdır. Təsəvvür eləyin, sülhməramlıların ailələri bölgədədir, ermənilər də bilərəkdən bundan istifadə edib ordumuzun mövqelərinə atəş açırlar və müxtəlif təxribatlar törədirlər, Azərbaycan da buna dözməyib ərazidə anti-terror əməliyyatları keçirir, nəticədə isə ermənilər ay-küy salacaqlar ki, Azərbaycan hərbiçiləri rus hərbiçilərinin ailələrinə hücum edir. Bununla Azərbaycan ilə Rusiyanı qarşı-qarşıya qoymağa çalışacaqlar. Arayikin bu müraciəti təxribat xarakterli plana oxşayır”.

Politoloq Rusiyanın Qarabağda qalmasının yollarının axtardığını da qeyd edib.

“Bundan əvvəl Qarabağda rus icması məsələsini qaldırmışdılar. Bu məsələ hələ də diqqət mərkəzindədir. Rus hərbiçilərinin ailələrini və övladlarını Qarabağa köçürülməsi ərazilərimizdə rus dilli məktəblərin artmasına gətirib çıxaracaq. Bu Rusiyanın bölgədə gələcək maraqlarına xidmət edir”.

Yunis Abdullayev