Azərbaycan Prezidenti Administrasiyası “reinteqrasiya ilə bağlı təmasları davam etdirmək, habelə Qarabağda infrastruktur layihələrinin həyata keçirilməsini müzakirə etmək üçün Qarabağın erməni icmasının nümayəndələrini ikinci görüşə” dəvət edib.

Bununla bağlı Ednews-a sülhməramlı təşəbbüsləri ilə gündəm yaradan erməni fəal, bloger İşxan Verdyan bildirib ki, Azərbaycan düşünülmüş, səriştəli və nüfuzlu siyasi addımlar atıb. Ancaq, təəssüf ki, heç bir nəticə verməyəcək, çünki Bakıya heç bir erməni gəlməyəcək”.

Onun sözlərinə görə, Ermənistan Rusiyanın maraqlarına zidd addımlar ata bilməyəcək:

“Rusiya dəfələrlə Qarabağın onun maraqlarının zonası olduğunu açıq şəkildə bəyan edib və əminəm ki, Ermənistanın bu məsələdə heç bir təşəbbüsünə dözməyəcək. Rusiya Ermənistanın iqtisadi hegemonudur, Ermənistanın bütün həyati kommunikasiyaları Rusiyaya bağlıdır. Sözün əsl mənasında Ermənistan kənara addım atmağa cəhd etsə, onu sosial böhran, aclıq təhlükəsi gözləyir. Ermənistan Rusiyanın iradəsinə müqavimət göstərə bilməyəcək. Əgər Kreml qərara alsa ki, Rusiya tərəfi mütləq sülh prosesində iştirak etməlidir, onda Paşinyanın yalnız bir işi var - itaət etmək”.

Ülviyyə Şahin