Azərbaycanın Xankəndi şəhərindəki separatçı rejimin rəhbəri Araik Arutyunyan Sərsəng su anbarında vəziyyətin kritik olduğunu bildirib. O, Sərsəngdəki ehtiyatın elektrik enerjisi təminatı üçün istifadə edildiyini, bu səbəbdən anbarda suyun tükəndiyini deyib. Xankəndidəki separatçı rejimin Sərsəng su anbarının enerji istehlakını bilərəkdən sürətlə artıraraq suyun səviyyəsini aşağı salıb.

Məsələ ilə bağlı Ednews-a açıqlmasında ekoloq Məhərrəm Mehriyev bildirib ki, Sərsəng su anbarı ölkəmiz üçün çox xeyirlidir. 

“Su ilə bağlı hər hansısa bir terrorizm dünyada böyük səs-küyə gətirib çıxaracaq. Bu su anbarından 100 min hektardan çox əkin torpaqlarının suvarılmasında istifadə olunur. 30 il düşmən tapdağı altında olan bu anbarımızı indilərdə dirçəldirik. İşğal ərzində ermənilər yaz və yay fəsillərində suyu təmiz kəsirdilər. Qış fəsillərində isə anbar su ilə dolduğu üçün suyu açıb buraxırdılar ki, bizim əkin sahələrimiz, tarlalarımız, bostanlarımız, bağlarımız su içində olurdu. Sərsəng su anbarı həm ekoloji, həm də iqtisadi cəhətdən çox faydalıdır. Bu anbarın iqlimə təsirinin yumşaldılması cəhətdən əhəmiyəti böyükdür”.

Politoloq Qabil Hüseynli də məsələyə münasibət bildirib. O, qeyd edib ki, işğala son qoyulsa da sülhməramlıların nəzarəti altında olan – Qarabağın ermənilər yaşayan hissəsində qalan Sərsəng su anbarından isə Azərbaycanın rayonlarına su verilişi hələ də bərpa edilməyib. Ermənilər faktiki olaraq “su terroru”nu davam etdirir.

“Ermənilər artıq Sərsəng su anbarına müdaxilə etməyə başlayıblar. Su qovuşuna artıq suyun bir hissəsi daxil olmur. Onların da Ermənistanda olan bir neçə su elektrik stansiyası var. Suyun qalan hissəsi birbaşa anbardan Ermənistana gedir. Sərsəngdəki ehtiyatın elektrik enerjisinin təminatı üçün istifadə edilir. Qalanı da çöllərə, dərələ, yaylalara gedir. Azərbaycana qoymurlar ki, su gəlsin. Avropa Şurasında bu hadisəni su genosidi adlandırıblar. Ona görə də Azərbaycan ya danışıqlar yolu ilə, ya da hərbi əməliyyat keçirməklə bu terrorun qarşısını almalıdır. Ağdərə-Kəlbəcər yolu nəzarətə götürülməlidir. Ordumuz tərəfidən bütün Tərtər çayı nəzarət altına alınmalıdır”.

Aysel Şahmar