Xəbər verdiyimiz kimi, Ermənistanın paytaxtı İrəvanda keçirilən Ağır atletika üzrə Avropa çempionatında Azərbaycan və Türkiyəyə qarşı növbəti təxribat törədilib. Beynəlxalq idman yarışında təmsil edilən dövlətlərin bayraqları arasında yalnız Azərbaycan və Türkiyənin Dövlət Bayrağı bir neçə hissəyə parçalanmış şəkildə asılıb. Bundan bir neçə gün əvvəl isə İrəvanda Avropa çempionatının açılış mərasimində Azərbaycan bayrağı yandırılıb.
Məsələ ilə bağlı Ednews-a danışan Milli Məclisin deputatı Aqil Abbas bildirdi ki, İrəvanda beynəlxalq yarış zamanı ölkələrin təqdimatı prosesində iştirakçı dövlətlərin bayraqları bir-bir tribunaya təqdim edilir. Bu zaman bir axmaq erməni Azərbaycan bayrağını yandırıb və səhnədən uzaqlaşdırılıb. Həmin hadisə zamanı o zaldan bu barbarlığı edəni də alqışlayıblar. Çünki onlar da eyni təfəkkürün daşıyıcılarıdırlar.
“İrəvanda idman yarışında təqdim edilən Azərbaycan bayrağını yandırmaq ermənilər üçün asan görünə bilər. Amma biz döyüşdə onların dərsini yaxşı vermişik. Onlar real savaşda bayraqlarını qoyub qaçan adamlardır. İndi özlərini bu hadisəyə görə qəhrəman kimi təqdim etməsinlər. Buna görə də, cavab verəcəklər. Biz ermənidən fərqli olaraq qürurlu, mədəni, böyük xalqıq. Bu barbarlığa görə idmançılarımız yarışdan imtinası da düzgün qərardır. Amma gərək idmançılarımız orada qalıb yarışda qalib olub həmin erməniləri himnimizi dinləməyə məcbur edərdilər. Təbii ki, idmançılarımızın bu qərarını alqışlayıram. Sözsüz ki, biz millət olaraq bayrağımıza, dövlətimizə sayğı olmayan yerdə qala bilmərik”.
Rusiyalı jurnalist və hərbi ekspert, Milli Müdafiə jurnalının baş redaktoru İqor Korotçenko da məsələ ilə bağlı Ednews-a danışıb.
“Ermənistan həmişə olduğu kimi öz ampluasındadır. Azərbaycandan ağır atletlərinin də iştirak etdiyi Avropa çempionatının rəsmi açılış mərasimində Aram Nikolyan çirkin və alçaq fənd edib”.
İ.Korotçenko qeyd edib ki, İrəvanda baş verənlər milli nifrət və düşmənçiliyi qızışdırır.
P.S. Bu addımlar beynəlxalq idman təşkilatları tərəfində kəskin qınanmalı, Ermənistanda hər hansı mötəbər yarışın təşkilindən imtina edilməlidir.
Oğuz
